रानां अजूनय हुलपतात उज्यान

भांगरभूंय | प्रतिनिधी

6 दिसांंत उजो लागपाच्यो 205 घडणुको; दळाचे 797 जवान कार्यरत

भांंगरभूंंय I प्रतिनिधी
पणजी : रानांत लागिल्ल्या उज्याचेर नियंत्रण दवरपाक येस आयिल्याचो सरकाराचो दावो आसलो तरी राज्यांत सात वाठारांतल्या रानांनी अजून उजो धुमसता. फाटल्या 6 दिसांत उजो लागपाच्यो 205 घडणुको घडल्याे. उजो पालोवपा खातीर हवाई दळाच्या हेलिकॉप्टरा वरवीं उदकाची फवारणी सुरू आसा. उजो पालोवपाच्या कामांत रान खातें तशेंच उजो पालोवपी दळाचे मेळून 797 कर्मचारी कार्यरत आसात. 2 मार्च ते 8 मार्च मेरेन उजो लागपाच्यो 205 घडणुको घडल्याे, अशी म्हायती रान खात्याचे मंत्री विश्वजीत राणे हांणी दिली.

साट्रें, देरोडें, अनमोड घांट, शिगांव – कालें, कारेमोळ – कालें, पोत्रें – नेत्रावळी, धारबांदोडेंच्या रानांनी उजो धुमसत आसा. फोंडेंचो उजो पुराय तरेन पालोवपाक येस आयलां. फाटले तीन दीस नौदळाच्या हेलिकॉप्टरान उदकाची फवारणी जाताली. बिरेस्तारा हवाई दळाच्या हेलिकॉप्टरां वरवीं उदकाची फवारणी जाली. वाऱ्याक लागून उजो सगळ्याक पातळटा. साट्रें, अनमोड घांट हांगा देगणांत उजो धुमसता. थंय पावप कठीण जाल्ल्यान उजो नियंत्रणांत येवप कठीण जालां.
उज्याचे स्थितीची पळोवणी करपा खातीर रान खात्याचे 50 जवान मोलेंच्या रानांत कार्यरत आसात. मुखेल सचीव पुनीत कुमार गोयल, मुखेल रान संरक्षक राजीव गुप्ता, कार्यकारी रान संरक्षक सौरभ कुमार हे हेलिकॉप्टरांतल्यान पळोवणी करपाचे आसात.
मजगतीं, बिरेस्तारा सकाळीं विठ्ठलापूर – सांखळेच्या रानांत उजो लागलो. रस्तो नाशिल्ल्यान उजो पालोवपी दळाची गाडी थंय पावपाक शकली ना. लोकांनी बादल्यानी उदक व्हरून उजो पालयलो. सकाळीं 10 वरांचेर लागिल्लो उजो पालयता म्हणसर दनपार जाली. उजो लोकांच्या घरां लागी पाविल्ल्याची म्हायती मेळ्ळ्या.
उज्याचेर नियंत्रण दवरपाक रान खात्याक येस आयलां. रान खातें तशेंच उजो पालोपी दळ स्थितीचो नियाळ घेत आसा. दोशीं आड गुन्याव नोंद जातलो, अशें मुख्यमंत्री डॉ. प्रमोद सावंत हांणी सांगलें.
उजो लागपाचीं नेमकीं कारणां आतां मेरेन कोणेच सांगूंक ना. तीन कारणांक लागून उजो लागपाची शक्यताय उजो पालोवपी दळाचे संचालक नितीन रायकार हांणी उक्तायल्या.

कल्लप – उसगांवां दोंगरार उजो

फोंडें: कल्लप उसगांव वाठारांत एकठांय करून दवरिल्ल्या कड्डाक उजो लागलो आनी ते उपरांत तो पुराय दोंगराळ वाठारांत पातळ्ळो. ह्या उज्यांत थळाव्या लोकांच्यो कांय काजी लासल्यो.
फोंडें उजो पालोवपी दळाच्या कर्मचाऱ्यांनी घडणुकेचे सुवातेचेर धांव घेवन उजो पालयलो.
थळाव्या लोकांनी दिल्ले म्हायती प्रमाण बुधवारा सांजे वेळार अळमी तयार केल्या उपरांत भायर सांठोवन दवरिल्ल्या कड्डाक उजो घातिल्लो. रातीं उसरां मेरेन ह्या कड्डाक लागिल्लो. उजो खूब जाणांनी पळयिल्लो. पूण बिरेस्तारा दनपारा ह्या वाठारांतल्या तणाक तो उजो लागून पुराय दोंगराळ वाठारांत पातळ्ळो.
ह्या उज्याक लागून लागसारच्या घरांक धोको निर्माण जाल्लो. पूण घरांतल्या लोकांनी उजो पालोवपाचो यत्न केलो आनी ते उपरांत उजो पालोवपी दळाक आपयले.
मजगतीं, अनमोड घांटांत लेगीत तीन दिसा सावन उजो धुमसता. फोंडें आनी कुडचडें उजो पालोवपी दळाचे कर्मचारी उजो पालोवपाचो झुजा पांवड्याचेर यत्न करतात. पूण दोंगराळ वाठार आशिल्ल्यान थंय रस्त्यांची वेवस्था ना.
दोंगराळ वाठारांत गाडी व्हरपाक मेळानाशिल्ल्यान कर्मचाऱ्यांची धांदळ जाल्या. मोलें रान विभागाचे कर्मचारी लेगीत उजो पालोवपाचो यत्न करतात.

24 वरांत उज्याच्यो आनीक 92 घडणुको

भांगरभूंय I प्रतिनिधी
पणजीः बुधवार आनी बिरेस्तारच्या 24 वरांत राज्यांतल्या विवीध वाठारांनी 92 उजो लागपाच्या जाल्यार 7 आपत्कालीन कॉल्सांक उजो पालोवपी दळान प्रतिसाद दिलो. हातूंतल्यो दोन घडणुको गंभीर आशिल्ल्यो. कांय वाठारांतल्या उज्याचेर दळान नियंत्रण मेळयलां. 25.50 लाखांची मालमत्ता वाचयल्या, जाल्यार 12.17 लाखांचे मालमत्तेचें उज्यांत लुकसाण जालां.
पेडणें, पर्वरी, पोरणें गोंया दरेकी 5, म्हापश्यां 13, वास्को, कुंकळ्ळी दरेकी 4, फोंड्या 10, मडगांवां 11, कुडतरी 7, वेर्णा 9 जाल्यार दिवचले आनी काणकोणांत दरेकी 2 सुवातांचेर उजो लागपाच्यो घडणुको घडल्यात. ह्या सगल्या उज्याचेर दळान नियंत्रण मेळयलां. हातूंत 7 आपत्कालीन कॉल्सांचो अास्पाव आशिल्लो.
फाटल्या 15 दिसांत दळान 731 उज्याच्यो आनी 90 अापत्कालीन अशें वट्ट 822 फोन कॉल्सांक प्रतिसाद दिला. हातूंत सुमार 1.85 कोटींची मालमत्ता वाचयल्या. जाल्यार 1.06 कोटींच्या मालमत्तेचें लुकसाण जालां. उज्यांतल्या दोन आनी आपत्कालीन स्थितींतल्या 27 अशा 29 जाणांक दळान वाचोवपाक येस मेळयलां. तशेंच आपत्कालीन स्थितींत आशिल्ले 6 नागरीक आनी दोन जनावरांक मरण आयलां, अशी म्हायती दळान जारी केल्ले आंकडेवारींत आसा.