भांगरभूंय | प्रतिनिधी
– पंचायत खात्याचे आदेश, पंचायत पांवड्यार 26 जानेवारीक खासा ग्रामसभा
पणजी: पंचायत पांवड्यार प्रलंबीत आशिल्ल्या रानहक्क दाव्यां विशीं निर्णय घेवपाक 26 जानेवारी दिसा खासा ग्रामसभा घेवपाचे आदेश पंचायत खात्यान ग्रामपंचायतींक जारी केल्यात. कांय दिसां पयलीं मुख्यमंत्री डॉ. प्रमोद सावंत हांणी रानहक्का खातीर आयिल्ले चडांत चड दावे 31 मार्च मेरेन निकालांत काडपाची हमी दिल्ली. ते प्रमाण पंचायत खात्यान पंचायत पांवड्यार प्रलंबीत आशिल्ल्या दाव्यांक गती दिवपाचो निर्णय घेतला.
रानहक्कां खातीर आतां मेरेन राज्यभरांतल्यान 10,136 जाणांचे अर्ज दाखल जाल्यात. तातूंतले 6,543 प्रकरणांनी जागांची पडताळणी जाल्या. 2,993 अर्ज ग्रामसभेंत पावल्यात, 1,777 अर्जांक मंजुरी मेळ्ळ्या. रानहक्कां खातीर आयिल्ल्या दाव्यांक ग्रामसभेंत मंजुरी मेळ्ळे उपरांत ते उपजिल्होधिकारी, जिल्होधिकारी पांवड्यार वतात. थंयचे मंजुरी उपरांत संबंदितांक सनद दितात.
कांय जाणांचे अर्ज ग्रामसभे मेरेन पावल्यात. पूण तांणी गरजेचीं कागदपत्रां दिवंक नाशिल्ल्यान तांच्या अर्जा वयलीं प्रक्रिया आडखळून उरल्या. तशेंच अर्ज केल्ल्यांतल्यो कांय जाण जागो पडताळणी वेळार हजर रावनात. थंय फक्त रान खात्याचे अधिकारी हाजीर आसतात. ताका लागून फुडली प्रक्रिया नेटान जायना अशें दिसून आयलां. ते खातीर पंचायत पांवड्यार ते दावे वर्सांन वर्स प्रलंबीत आसात, अशें दावे 26 जानेवारीक खासा ग्रामसभा घेवन 31 मार्च मेरेन प्रलंबीत सगले दावे निकालांत काडपाचो निर्णय सरकारान घेतिल्लो. ते प्रमाण पंचायत खात्यान संंबंदींत पंचायतींक खासा ग्रामसभांचे आयोजन करून दावे बेगिनांत बेगीन निकालांत काडपाचे आदेश जारी केल्यात.
…………………….
पंचायत खातें गंभीर
कांय दिसां पयलीं पत्रकारां कडेन उलयतना मुख्यमंत्री डॉ. प्रमोद सावंत हांणी रान हक्कां खातीर दावे केल्ल्यांनी ग्रामसभांक हाजीर रावन आपले कडेन आशिल्लीं कागदपत्रां पंचायतींक दिवची आनी सरकाराक सहकार्य करचें, अशें आवाहन केल्लें.
सरकार पुराय पणान दावेदारांच्या फाटल्यान उबें आसा. हो प्रस्न न्यायालयांत आशिल्ल्यान दावे केल्ले जे ग्रामसभांकत हाजर रावनात, तांकां जमनीचे अधिकार मेळचें नात. ते उपरांत तांणी सरकाराक दोश दिवचो न्हय, अशी शिटकावणीय दिल्ली.
मुख्यमंत्र्यांची ही शिटकावणी दावेदार कितले पाळटले, हे 26जानेवारी दिसा कळटले.
……………………………………..
पंचायत पांवड्यार प्रलंबीत दावे
केपें : 1,621
धारबांदोडें : 558
काणकोण : 2,342
सांगें : 953
फोंडें : 227
सत्तरी : 1,229
अातां मेरेन फक्त 485 दावे निकालांत
रानहक्का विशीं 31 ऑक्टोबर 2023 मेरेन वट्ट 10,136 दावे दाखल जाल्ले. तातूंतले फक्त 485 दावे निकालांत काडून अर्जदारांक जमनींचे हक्क दिल्यात. हे प्रमाण फक्त 4.7 टक्के आशिल्ल्याचे लोकसभेंतल्या लेखी प्रस्नांच्या जापेंतल्यान मुखार आयलें. अजुनूय 9,651 दावे प्रलंबीत आसून, पंचायत पांवड्यार तांची संख्या चड आशिल्ल्याचे स्पश्ट जाला. ताका लागून सरकारान आतां प्रलंबीत दाव्यांक गती दिवपाचो निश्चेव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
