भांगरभूंय | प्रतिनिधी
मॉवीनः मोटारसायकल सेवा लेगीत चलतली अॅपाचेर
पणजी : मोपा विमानतळा सयत दाबोळी विमानतळ लेगीत बरे भशेन चलतलो जाल्यार मल्टीमोड अॅप सुरू जावपाची गरज आसा. हो अॅप सुरू जालो ना, जाल्यार दाबोळी विमानतळाचें लुकसाण जातलें. मोपा विमानतळ जाले उपरांत दाबोळी विमानतळाचें लुकसाण जावपाक जायना, म्हूण 10 दिसां भितर भोवउद्देशी अॅप सुरू जातलो. दाबोळी विमानतळा सावन अॅपाची सुरवात जातली, अशें येरादारी मंत्री मॉवीन गुदिन्हो हांणी सांगलें.
टॅक्सी, रिक्शा सेवे सयत अॅपाचेर आदारीत मोटारसायकल सेवा सुरू जातली. एखादो पर्यटक वा प्रवाशा कडेन सामान चड नासत वा तो एकलोच आसात जाल्यार तो मोटारसायकलीक पसंती दितलो. ते खातीर प्रवाशांचे सुविधे खातीर मोटारसायकल अॅप सेवा सुरू जातली.
अॅप सेवा ही काळाची गरज आसा. सगल्या राज्यांनी वा व्हड शारांनी अॅप सेवा सुरू आसा. अॅप सेवा गोयांत सुरू जाली ना जाल्यार गोंय फाटीं उरतलें. पर्यटकांची गैरसोय जातली. हाका लागून अॅप सेवे बगर राज्याक पर्याय ना. बेगिनूच मोपा विमानतळ सुरू जातलो. मोपा विमानतळाचेर अॅप टॅक्सी सेवा आसतली. अशीच सेवा दाबोळी विमानतळाचेर आसपाची गरज आसा. कांय तेंपा पयलीं गोवा मायल्स अॅप टॅक्सी सेवा आशिल्ली. थळाव्या टॅक्सीकारांचे मागणे उपरांत दाबोळी विमानतळा वयलो गोवा मायल्स सेवेचो कावंटर बंद केलो. कावंटर बंद केलो तरी गोवा मायल्स अॅप सेवा सुरू आसा.
टॅक्सी, रिक्शा तशेंच मोटारसायकल सेवा अॅपाचेर मेळटली. ही सेवा सुरू करपा विशी टॅक्सी संघटणां कडेन उलोवणी सुरू आसा. टॅक्सी संघटणेन अॅप सेवा स्विकारची, ना जाल्यार तुमचो फुडार कितें ते थारयात, अशी शिटकावणी मंत्री मॉवीन गुदिन्हो हांणी दिल्या.
काळ बदलता तशे राज्याक बदलपाक जाय. ओला आनी उबर ही सेवा सध्या बरी चलना. भितरल्या समस्यांक लागून ओला आनी उबर सेवेक मेळपी प्रतिसाद उणो जाला, अशें मंत्री मॉविन गुदिन्हो हांणी सांगलें.
गोंय हें आतां लॉजिस्टीक हब जावपाचे आसा. लॉजिस्टीक हब जाले उपरांत भायल्या लोकांचो वावर वाडटलो. तांकां दर्जेदार टॅक्सी सेवा तशेंच मोटारसायकल सेवा मेळपाक जाय. सगल्या वाठारांनी सर्त आसा. बरी सेवा दिता, तोच सर्तीत तिगून उरतलो, अशें गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
