भांगरभूंय | प्रतिनिधी
आयज हांगाच्या नरेंद्र मोदी स्टेडियमाचेर गुजरात टायटन्स आनी राजस्थान रॉयल्स ह्या पंगडां मदीं इंडीयन प्रिमीयर लिगेची (आयपीएल) फायनल जातली.
14 वर्सां पयलीं आयपीएलाच्या पयल्या हंगामाचें वस्तादपण जोडपी राजस्थान रॉयल्सा कडेन परतून एकदा इतिहास घडोवपाची संद आसा. दुसरे वटेन दिग्गज पंगडांक हारोवन आपले पयलेच लिगेंत खेळपी गुजरात टायटन्सा कडेन इतिहास घडोवपाची संद आसा.
दोन म्हयन्यां पयलीं आयपीएलाच्या 15व्या हंगामात सुरवात जाल्ली त्या वेळार हे दोनूय पंगड फायनलींत खेळटले अशें कोणांक दिसूंक नाशिल्लें.
फाटल्या कांय म्हयन्यांनी चड उतार पळोवपी हार्दिक पांड्या आनी पंगडांतल्या सहाय्यक स्टाफान गुजरात टायटन्साक वयले सुवातेर हाडलो. आयपीएलाचे मेगा पावणे उपरांत गुजरात पंगडाचेर मॅच खेळचे आदींच हारिल्लो पंगड अशी टिका सुरू जाल्ली. पूण, मैदाना वयले कामगिरीन ताणें टिकाकारांचें तोंड बंद केलें.
गुजरात पंगडांत जैत मेळोवन दिवपी साबार खेळगडे आसात. पूण, हो पंगड कागदाचेर बळिश्ठ दिसनाशिल्लो. पूण, क्रिकेट सारक्या अनिश्चीततायेच्या खेळांत ह्या खेळगड्यांनी जबरदस्त प्रदर्शन केलें. फॉर्मांत आयिल्ल्या हार्दिक पांड्यान मुखेलपदाचें वजें घेनासतना बॅटींग केली. दुसरे वटेन फाटल्या पांच वर्सां पसून लय मेळोवपाक झुजपी मिलरान सगल्यांक अजापाचो धपको दिलो. फाटल्या हंगामांत शारजांत जाल्ले एके मॅचींत मारिल्ले पांच सके हें फ्लूक नाशिल्लें हें राहुल तेवतियान सिद्ध केलें.
लेग स्पिनर राशिद खान आपल्या विविधतायेन प्रतिस्पर्धी बॅट्समनांक जाळांत घुस्पयता. जाल्यार वृद्धिमान साहान आनीक एक हंगाम खेळपाचें निश्चीत केलां.
दुसरे वटेन राजस्थान रॉयल्स लेगीत उणो ना. आयपीएलाचें पयलें वस्तादपण ताणें सर्गेस्त शेन वॉर्नाच्या फुडारपणाखाला मेळयिल्लें. ते उपरांत तो पयलेच खेपे फायनलींत पावला.
राजस्थानांत मुखेली संजू सॅमसना खेरीत आर आश्विन, युजवेंद्र चहल, जोस बटलर, ट्रॅण्ट बोल्ट सारके दिग्गज जाल्यार यशश्वी जैयस्वाल आनी प्रसिद्ध कृष्णा सारके प्रतिभावंत युवा खेळगडे आसात. संजून ह्या सगल्यांक एकठांय घेवन फायनली मेरेन पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
