भांगरभूंय | प्रतिनिधी
खबरां संस्था
नवी दिल्लीः महाराष्ट्रांतल्या सत्ता संघर्शाचेर सर्वोच्च न्यायालयान सोमाराक बडखोर एकनाथ शिंदे पंगडाक थाकाय दितना तांच्या 16 आमदारांच्या अपात्रतेय संबदी 11 जुलय मेरेन निर्णय घेवपाक मनाय करून महाविकास आघाडी सरकाराक धपको दिला. ह्या निर्णयान शिंदे पंगडात खोशयेचें वातावरण पातळ्ळां. सर्वोच्च न्यायालयाच्या ह्या निर्णया उपरांत महाराष्ट्र भाजपाचे कोअर पंगडाची बसका जाली. तातूंत जाल्ले चर्चेची म्हायती सुधीर मुनगंटीवार हांणी प्रसार माध्यमांक दिली.
राज्यातंले अस्थीर परिस्थितीचेर भाजपाचें बारीक लक्ष आसा. एकनाथ शिंदे हांणी आमकां कसलीच ऑफर दिली ना. भाजपा कडेन प्रस्ताव आयल्यार आमी विचार करतले. निमणे आमच्या पक्षांत नि्र्णय घेवपाचो अधिकार कोअर पंगडाक आसा. तांणी जर प्रस्ताव दिलो जाल्यार हो पंगड ताचेर विचार करतलो अशें मुनगंटीवार हांणी स्पश्ट केलां.
सध्या आमचो महाविकास आघाडी सरकारा आड अविश्वास थाराव हाडपाची गरज दिसना. आमी थांबात आनी पळयात हे भूमिकेंत आसात. आमी शिवसेनेच्या खंयच्याय आमदाराक बंडखोर समजनात, संजय राऊत हांच्या वक्तव्याचेर हांव कांय उलोवचो ना. प्रसार माध्यमांनी तांकां गंभीरपणान घेवचें न्हय अशें तांणी सांगलें.
राज्यांत राजकीय अस्थिरताय आशिल्ल्यान भाजपा आमदारांनी राज्या भायर वच्चें न्हय अश्यो सूचोवण्यो दिल्यात. भाजपाच्या सगल्या 106 आमदारांक बुधवारा मुंबय येवपाचो आदेश पक्षश्रेश्ठींनी दिल्यात अशें सूत्रांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
