भांगरभूंय | प्रतिनिधी
अंमलबजावणे खातीर कर्मचाऱ्यांत वाड,
म्हामार्गार चार अॅम्बुलन्स दवरपाचोय विचार
भांगरभूंय I प्रतिनिधी
पणजीः रस्तो सुरक्षे संदर्भांतल्या उपाय येवजण्यांचे अंमलबजावणे खातीर येरादारी खात्यांतल्या कर्मचाऱ्यांनी वाड करपा सयत म्हामार्गार चार अॅम्बुलन्सांची वेवस्था करपाचो निर्णय मुख्यमंत्री डॉ. प्रमोद सावंत हांचे फुडारपणा खाला जाल्ले उच्च पांवड्या वयले बसकेंत
घेतलो.
बसकेक मुख्यमंत्र्या सयत येरादारी सचीव सुभाष चंद्रा, पुलीस म्हासंचालक डॉ. जसपाल सिंग, पुलीस म्हानिरिक्षक ओमवीर सिंग, उत्तर गोंय जिल्होधिकारी मामू हागे, दक्षीण गोंय जिल्होधिकारी अश्वीन चंद्रा, पीडब्ल्यूडीचे प्रधान मुख्य अभियंता उत्तम पार्सेकार, येरादारी संचालक राजन सातार्डेकार, पंचायत संचालक सिद्धी हळर्णकार, नगरविकास संचालक गुरूदास पिळर्णकार, शिक्षण संचालक शैलेश झिंगडे, येरादारी पुलीस अधिक्षक बॉस्युएट सिल्वा, गोमॅकॉचे डीन डॉ. एस. एम. बांदेकार बसकेक हाजीर
आशिल्ले.
मुख्यमंत्री डॉ. सावंत हांणी बसकेंत राज्यांतल्या वाडट्या रस्तो अपघात आनी ताका लागून मरणा विशीं हुस्को उक्तायलो. अपघातांचेर नियंत्रण दवरपाक बेगोबेग उपाय येवजण्यांची अंमलबजावणी करपाचे निर्देश तांणी अधिकाऱ्यांक दिले.
2022त रस्तो अपघातांनी सुमार 251 जाणांक मरण अायलें. गांवांतले रस्ते आनी मुखेल जिल्हो मार्गांचेर सगल्यांत चड अपघात जाल्ल्याचे निदर्शनाक अायलें. अपघातांची नेमकीं कारणां सोदून ताचेर मात करपा खातीर उपाय येवजण्यो राबोवच्यो.
मार्गांचेर सायनबोर्ड, बॅरिकेट्स आनी सुरक्षेचे नदरेन म्हत्वाच्या गजालींचेर लक्ष दवरप, सीसीटिव्ही वरवीं येरादारी नेमांक पाळो दिनात तांचेर कायद्या प्रमाण कारवाय करची.
अपघात जाल्ल्यांचे जीव वाचोवपाक भलायकी विभागान दोनूय जिल्हो हॉस्पिटलांत तंत्रीक कर्मचारी आनी म्हामार्गांचेर चार अॅम्बुलन्स दवरपा विशीं निर्णय घेवचो.
शिक्षण विभागान शारीरीक शिक्षकांक रस्तो सुरक्षेचे प्रशिक्षण दिवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
