भांगरभूंय | प्रतिनिधी
विश्व कोंकणी केंद्रांत रंगप्पा कामत हांच्या चित्राचें लोकार्पण
भांगरभूंय । खबरां मेज
पणजी : रंगप्पा कामत हांणी आपले उद्देजकतायेनन एके पिळगेच्या हजारांनी तरणाट्यांक प्रेरणा दिली. विश्व कोंकणी केंद्राच्या सभाघरांतलें तांचें चित्र फुडाराक तरणाट्यांक तीच प्रेरणा दिवप मुखार चालू दवरलें, अशें मत धेंपो कंपनी समुहाचे अध्यक्ष श्रीनिवास व्ही. धेंपो हांणी उक्तायलें.
कामत ग्रुप आॅफ हाॅटेल्सचे संस्थापक सर्गेस्त रंगप्पा पांडुरंग कामत हांच्या तैलचित्राचें मंगळुरूच्या विश्व कोंकणी केंद्रांत लोकार्पण जालें. त्या वेळार ते उलयताले. 18 जून हो गोंय क्रांती दीस. 1946 वर्सा राम मनोहर लोहियान गोंयच्या सुटके खातीर क्रांती ज्योत पेटयली. तांचेच भशेन हाॅटेल वेवसायांत क्रांती घडोवन हजारांनी तरणाट्यांक नोकरी मेळोवन दिली, अशें धेंपो हांणी सांगलें.
विश्व कोंकणी केंद्रान हाॅल आॅफ फेम सभाघरांत साबार कोंकणी मनश्यांचे फोटो लायल्यात, ते पळोवन खोस जाता. तरणाट्यांक तांचे पसून स्फूर्त मेळटली, अशें सांगून तांणी कोंकणी केंद्राची तुस्त केली. कोंकणी भास, संस्कृताय सांबाळपांत, कोंकणी मनशांची उदरगत करपांत ह्या केंद्रान बरें काम केलां, अशें तांणी सांगलें. कोंकणी सरदार बस्ती वामन शणै हांचोय तांणी उगडास काडलो.
ह्या वेळार मानाचे सोयरे म्हूण रंगप्पा कामत हांचे पूत रामचंद्र कामत (चॅरमन, कामत ग्रुप आॅफ हाॅटेल्स) हाजीर आशिल्ले. रंगप्पा कामत हांणी दाखयिल्ले वांटेर आमी चलतात. तांचीं तत्वां सांबाळून आमी वावुरतले अशें तांणी सांगलें.
कोंकणी भास आनी संस्कृती प्रतिश्ठानाचे अध्यक्ष नंदगोपाल शणै हांणी येवकार दिलो. केंद्राच्या नव्या प्रकल्पांची तांणी म्हायती दिली. विश्व कोंकणी विद्यार्थी शिश्यवृत्ती कार्यावळीचे सचीव प्रदीप जी पै हांणी रंगप्पा कामत हांचे विशीं म्हायती दिली.
गिरीधर कामत हांणी उपकार मानले. गुरुदास बंटवाळकारान सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
