भांगरभूंय | प्रतिनिधी
विधीमंडळ फांट्या कडल्यान नेमणुकेचो आदेश जारी
पणजी : काँग्रेस विधीमंडळ फुडारी युरी आलेमांव हांची विरोधी पक्ष फुडारी म्हूण नेमणूक जाल्या. विधीमंडळ सचीव नम्रता उल्मन हांणी नेमणुकेचो आदेश जारी केला. आम आदमी पक्ष, गोवा फॉरवर्ड हांचे परस काँग्रेसीचे तीन आमदार आशिल्ल्यान काँग्रेसीक विरोधी पक्ष फुडारीपद फावो जालां.
गोंय विधानसभेंत 40 आमदार आसात. काँग्रेसीच्या 8 आमदारांनी भाजपांत प्रवेश केले उपरांत काँग्रेसी कडेन फक्त तीन आमदार उरल्यात. हे प्रमाण विधानसभेच्या 10 टक्क्यां परस उणें आशिल्ल्यान काँग्रेस विधीमंडळ फुडाऱ्याक विरोधी पक्ष फुडाऱ्याचें पद मेळपा विशीं दुबाव आशिल्लो. सत्ताधारी भाजपा उपरांत काँग्रेसीचे चड आमदार आसले तरी ते विधानसभेच्या 10 टक्के परस उणें आसात. एखाद्या पक्षा कडेन विधानसभेच्या 10 टक्या परस उणे आमदार आसले जाल्यार विरोधी पक्ष फुडारीपदाचो दर्जो मेळना, अशें मत कायदेतज्ञांनी लेगीत उक्तायिल्लें. विरोधी पक्ष फुडारीपद दिवचें काय ना, हे सरकार तशेंच सभापतींचेर निंबून आसा, अशें मत कांय जाणकारांनी उक्तायिल्लें. हाका लागून विधानसभेक आतां विरोधी पक्ष फुडारी आसचो ना, अशी स्थिती निर्माण जाल्ली. पूण युरी आलेमांव हांच्या रूपान राज्याक नवो विरोधी पक्ष फुडारी मेळ्ळा.
गोंयांक विरोधी पक्ष फुडारी मेळ्ळा, म्हूण आपूण खोशी आसा. विधानसभेंत विरोधी पक्षांचे नेतृत्व करपा सयत सरकाराच्या कारभाराचेर नदर दवरपाची जापसालदारी विरोधी पक्ष फुडाऱ्याची आसता. युरी आलेमांव समेस्त गोंयकारांचें प्रस्न मांडटलें, अशें प्रदेश काँग्रेस अध्यक्ष अमीत पाटकार हांणी म्हणलें.
विधानसभा वेंचणुकेंत भाजपाक 20 जाल्यार काँग्रेसीक 11 सुवातो मेळ्ळ्यो. मगो आनी अपक्षांच्या तेंक्याक लागून भाजपान सरकार स्थापन केलें. आमदार मायकल लोबो हांची काँग्रेस विधीमंडळ फुडारीपदार निवड जाली. हाका लागून ते विरोधी पक्ष फुडारी जाले. चवथी उपरांत मायकल लोबो हांचे सयत काँग्रेसीच्या 8 आमदारांनी भाजपांत प्रवेश केलो. भाजपांत प्रवेश करचे पयलीं मायकल लोबो हांणी विरोधी पक्ष फुडारीपदाचो राजिनामो दिल्लो.
विधानसभेंत आतां भाजपाचे 28, मगोचे 2, काँग्रेसीचे 3, गोवा फॉरवर्ड 1, आप 2, आरजी 1 जाल्यार 3 अपक्ष आमदार आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
