भांगरभूंय | प्रतिनिधी
गोंय खंडपिठाचो निर्देश; सेरुला कोमुनिदाद जमीन वेव्हार प्रकरण
पणजी: बनावट कागदपत्रां वरवीं जमीन हडप केल्ल्या प्रकरणांची चवकशी करपा खातीर सरकारान निवृत्त न्यायाधीश व्हीके जाधव हांच्या फुडारपणा खाला चवकशी आयोगाची स्थापणूक केल्या. हो आयोग चालीक लागले उपरांत 15 दिसां भितर सेरुला कोमुनिदाद जमीन वेव्हारा विशींच्यो कागाळी वा याचिका आयोगा मुखार मांडपाची मेकळीक मुंबय उच्च न्यायालयाच्या गोंय खंडपिठान दिल्या. हे विशींचो निर्देश न्या. गिरीश कुलकर्णी आनी न्या. भारत देशपांडे ह्या दोन वांगडी खंडपिठान जारी केला.
ह्या प्रकरणांत मिगुएल वाझ हांणी खंडपिठांत 2014 वर्सा जनहीत याचिका दाखल केल्ली. जाल्यार अरविंद शिरोडकार हांणी 2015 वर्सा याचिका दाखल केल्ली. ह्या दोनूय याचिकेंत सेरुला कोमुनिदादींत व्हड प्रमाणांत बनावट कागदपत्रां वरवीं जमीन हस्तांतरण वा हडप केल्ल्याचो मुद्दो उपस्थीत केल्लो.
तशेंच वाझ हांणी जनहीत याचिकेंत सुमार 10 भुंयखंडाची चवकशी उच्च न्यायालयाचे निवृत्त न्यायाधिशा वतीन करपाची मागणी केल्ली. जाल्यार शिरोडकार हांणी सुकूर हांगासरले दोन भुंयखंड बेकायदो पद्दतीन हस्तांतरण केल्ल्याचो दावो केल्लो.
मजगतीं, आनीक एका प्रकरणांत खंडपिठाच्या आदेशा प्रमाण गोंय सरकारान जमीन वेव्हारांची चवकशी करपा खातीर स्थापन केल्ल्या आयोगा कडेन स्थापन केल्लें. शिरोडकार हांकां वचपाची मेकळीक दिवन 6 एप्रील 2017 दिसा निकालांत काडिल्ली. ह्या प्रकरणांत कांयच जावंक नाशिल्ल्यान तांणी फेब्रुवारी 2012 वर्सा याचिका परतून सुनावणेक घेवपाची मागणी खंडपिठा कडेन केली. ते प्रमाण खंडपिठान तांची तशेंच वाझ हांची जनहीत याचिका एकठांय करून परतून सुनावणी सुरू केली.
ह्याच वेळार बनावट कागदपत्रांच्या आदारान सरकारी तशेंच खाजगी जमीन हडप करपी तशेंच तांची विक्री करप्यांक धरपा खातीर गोंय सरकारान कांय म्हयन्यां पयलीं आयपीएस अधिकारी निधीन वाल्सन हांच्या फुडारपणा खाला विशेश तपास पंगडाची (एसआयटी) स्थापणूक केल्ल्याची म्हायती खंडपिठाक दिली. जाल्यार अशा प्रकरणांतल्या जमनी विशीं कायदेशीर निर्णय घेवपा खातीर सरकारान निवृत्त न्यायाधीश व्ही. के. जाधव हांच्या फुडारपणा खाला चवकशी आयोगाची स्थापणूक केल्ल्याची म्हायती सरकारी वकिलान खंडपिठांत दिली. हाची दखल घेवन वयलें प्रकरण एकूच तरेचें आशिल्ल्यान खंडपिठान याचिकादारांक मेकळीक दिवन दोनूय याचिका निकालांत काडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
