भांगरभूंय | प्रतिनिधी
अधिकारग्रहण मुद्द्यां वयल्यान विद्यार्थ्यांचें चार वरां धरणें आंदोलन
भांगरभूंय I प्रतिनिधी
म्हापशेंः कॉलेजींत विद्यार्थी परिशद समितीची स्थापणूक करून अधिकारग्रहण सुवाळो करचो, हे मागणे खातीर अखील भारतीय विद्यार्थी परिशदेच्या बावट्या खाला हे संघटणेच्या प्रतिनिधींनी म्हापशेंतल्या सेंट झेवियर कॉलेजींत चार वरां धरणें अांदोलन करून गोंदळ घातलो. ह्या वेळार आंदोलक आनी कॉलेजीच्या शिक्षकां मदीं बाचाबाची जाली.
दंडाधिकारी आनी पुलिसांनी मध्यस्ती करून तशेंच विद्यार्थ्यांची समजून काडून मंगळारा 24 वेर उपजिल्होधिकाऱ्यां कडेन जोड बसका घेवपाचे प्राचार्यांनी मान्य केले उपरांत अांदोलकांनी आंदोलन फाटीं घेतलें.
हो प्रकार शेनवारा सकाळीं 10.30 वराच्या सुमाराक घडलो. कॉलेजींतल्या विद्यार्थी संघटणेचे सरचिटणीस साहील महाजन हांचे सयत अभाविपचे सुमार 10 प्रतिनिधीं म्हाविद्यालयाच्या कॅम्पसांत दाखल जाले. तांणी घोशणा दिवन विद्यार्थी परिशद समितीची स्थापणूक करची आनी प्राचार्यांनी आमची भेट घेवची अशी मागणी करून थंयच बसून आंदोलन केलें.
घडणुकेची म्हायती मेळ्ळे उपरांत कायदो आनी सुवेवस्था इबाडची न्हय म्हूण पुलीस निरिक्षक परेश नायक हांचे वांगडा पुलीस फौज थंय दाखल जाली. निरिक्षक नायक हांणी आंदोलक प्रतिनिधींची समजून काडपाचो यत्न केलो.
आंदोलक प्रतिनिधींनी काॅलेजच्या प्राचार्यांची भेट मागली, पूण प्राचार्यांनी सकारात्मक प्रतिसाद दिवंक नाशिल्ल्यान हो विशय अदीक ताणलो. परिणामी कॉलजेच्या हेर प्राध्यापक आनी अभावीप संघटणेंत संघर्श पेटलो. स्थिती हाता भायर वचपाक लागले उपरांत पुलिसांनी जोड मामलेदार तशेंच दंडाधिकारी वर्षा परब हांकां आपयले. दंडाधिकाऱ्यांनी हे संघटणेचे म्हणणें आयकून घेवन उपरांत कॉलेजच्या प्राचार्यांची भेट घेतली. दोन वरां उपरांत प्राचार्य उलोवपा खातीर येवंक नाशिल्ल्यान आंदोलक प्रतिनिधी प्राचार्यांच्या कार्यालया गेले. पूण पुलिसांनी तांकां आडायले.
ह्या वेळार प्राध्यापक आनी आंदोलक प्रतिनिधीं मदीं बाचाबाची जाली. मानहानीकारक शब्द वापरून आमचो तशेंच कॉलेजचो अपमान करपा सयत शांतताय इबाडिल्ल्याचो दावो करून प्राध्यापकांनी आंदोलकांक भायर काडपाची मागणी केली. तशेंच पुलीस आंदोलकांक सहकार्य करीत आशिल्ल्याचो आरोप शिक्षकांनी केलो. तशेंच हो संवेदनशील विशय हाताळपाक पुलीस आनी प्रशासन अपेशी थारिल्ल्याचो आरोपूय तांणी केलो.
अभावीपचे बावटे घेवन कॅम्पसांत घोशणाबाजी
कॉलेज प्रशासन अानी संघटणेंतल्या विद्यार्थी परिशदेच्या विशया वयल्यान संघर्श पेटलो.
चार वरां अभावीपचे कॅम्पसांत धरणें, कॉलजे प्रशासनाक धरले वेठीक.
अनुचीत प्रकार घडचो न्हय म्हूण कॉलेज प्रशासनान वर्ग थांबोवन सगल्या विद्यार्थ्यांक घरा धाडले.
पुलिसांच्या फौजफाट्यांक लागून कॉलेजीक छावणीचे स्वरूप
प्राध्यापक आनी अभावीप संघटणेच्या पाधिकाऱ्यां मदीं आरोप-प्रत्यारोपाक लागून कॅम्पसांतले वातावरण तापलें.
अखेर प्राचार्यांनी दिलो चर्चे खातीर वेळ
जोड मामलेदार वर्षा परब, पुलीस उपअधिक्षक जिवबा दळवी आनी निरिक्षक नायक हांणी प्राचार्यांची भेट घेतली. चर्चे उपरांत दंडाधिकाऱ्यानी ह्या आंदोलनकर्त्यांक चर्चे खातीर वेळ दिलो. मंगळारा 24 वेर उपजिल्होधिकाऱ्या वांगडा कॉलेज प्राचार्य आनी कॉलेज विद्यार्थी परिशदेच्या पांच वांगड्यांची दनपारां 12 वरांचेर उपजिल्होधिकाऱ्यांच्या कार्यालयांत जोड बसका जातली. दंडाधिकाऱ्या कडल्यान आस्वासन मेळ्ळे उपरांत अभावीपान आपलें धरणें आंदोलन फाटीं घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
