म्हापश्यां आयच्यान चवथीचो बाजार

भांगरभूंय | प्रतिनिधी

विक्रेत्यां खातीर 170 सुवातो आंखतले; परवानगे बगर विक्री करप्यांचेर जातली कारवाय

भांगरभूंय । प्रतिनिधी

म्हापशें: म्हापशेंच्या पालिका मार्केटांत अंदूं चवथीचो बाजार शेनवारा 27 ऑगस्ट सावन भरतलो. पालिकेन हे खातीर खाशेलें नियोजन केलां. कोरोनाचे फाटभुंयेर दोन वर्सां उपरांत बाजारांतले गर्दे वयले सरकारान निर्बंध काडिल्ल्यान अंदूं हो बाजार पुराय तांकीन भरतलो, अशी म्हायती पालिके कडल्यान मेळ्ळ्या.

अंदूं माटोळी बाजार आनी हेर ल्हान विक्रेत्यां खातीर मार्केटांत सुमार 150 ते 170 सुवातो (स्टॉल्स) आंखतले. ते खातीर पालिके कडेन विक्रेत्यांचे अर्ज लेगीत आयल्यात पयलीं आयिल्ल्यांक पयलीं प्राधान्य दितले. तशेंच हेर स्ल्सा सयत पार्किंगे खातीर विशेश वेवस्था करतले.

बाजारपेठेंत भितर कोणाकूच थेट गाडी व्हरपाक मेळची ना. बाटा शोरुमा कडल्यान फक्त गाडयेक प्रवेश आसतलो जाल्यार युनियन फॉर्मासी कडल्यान वाहनां भायर काडपाक मेळटलीं. ते भायर प्रवेशदार आशिल्ले बाजारांतले हेर रस्ते बॅरिकेड्स घालून आडायतले.

बाजाराच्या मुख्य प्रवेशदारा वयले लेनीचे एके वटेन चारचाकी जाल्यार दुसरे वटेन दुचाकीं खातीर पार्किंगची वेवस्था आसतली. ह्या चवथीच्या बाजारांत मार्केटांत वाहनां कडल्यान कसलेंच शुल्क घेवचे नात, अशी म्हायती पालिकेचे मार्केट समितीचे अध्यक्ष तशेंच नगरसेवक विराज फडके हांणी दिल्या.

पार्किंग आनी येरादारीचेर नियंत्रण दवरचे खातीर पालिका कर्मचारी तैनात आसतले. एकादो विक्रेता परवानगी बगर मार्केटांत गाडी उबी करून विक्री करतना सांपडलो जाल्यार ताचेर रोखड्या रोखडी कारवाय करून म्हाल जप्त करतले. बाजारांतल्या विक्रेत्यां कडल्यान सुवातेचेरूच सोपो घेतले, अशें फडके हांणी स्पश्ट केलां.

मजगतीं, बिरेस्तारा नगराध्यक्ष शुभांगी वायंगणकार हांचे अध्यक्षते खाला पालिका मार्केट समितीची बसका जाली. अध्यक्ष विराज फडके, साईनाथ राऊळ, बार्बरा कारास्को, आशिर्वाद खोर्जुवेंकार, कमल डिसोझा हे नगरसेवक बसकेक हाजीर राविल्ले. हे बसकेंत चवथी खातीर बाजाराचें नियोजन केलें.

आराम सोडा वाठारांत वाहन पार्किंगची वेवस्था जावची हे खातीर ह्या वाठारांत रेंट अ बायक दिवप्यांच्यो पार्क केल्ल्यो दुचाकी चवथीच्या कालांत चार दिसां खातीर काडच्यो, अशी विनवणी येरादारी पुलिसांक पालिके वतीन करतले, अशें फडके हांणी सांगलें.

प्लास्टीक पोती वापरतल्यांचेर कारवायः फडके

चवथीच्या बाजाराक येवपी गिरायकांनी प्लास्टीक पोतयो हाडच्यो न्हय. लोकांनी प्लास्टीक पोतयो शक्यतो वापरच्यो न्हय. कपड्याच्या आनी हेर पोतयांक प्राधान्य दिवचें. कोणेय प्लास्टीक पोती हाडली जाल्यार वा विकल्यार संबंदितांचेर कारवाय करतले, अशें विराज फडके हांणी सांगलें.