भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पुलिसांनी आकय पेडें हांगचे डॉ पुरुषोत्तम पेडणेकार हांचें बंद घर फोडपी साहिल इसाक सयानावले आनी रझाक अस्लम मुजावर ह्या खाप्यां चोराक अटक केली. गोंयांत हेर कडेन जाल्ल्या घरफोडींत तांचो हात आसा अशें चवकशेंतल्यान दिसून आयला. ते संबंदतात दक्षीण आनी उत्तर गोंयांतले पुलीस स्टेशनांत तांकां व्हरतले.
चोरयेचो हो प्रकार आयताराक फांतोडेर घडिल्लो. डॉ पेडणेकार आपले घरकान्नी वांगडा विदेशांत पर्यटना खातीर गेल्ले. ती संद घेवन चोरांनी तांचें घर फोडल्लें. घरांतल्या कपाटांत खोटे दागिने, एक घड्याळ, चाव्यांचो घोस, रुद्राक्ष आनी किरळोळ रक्कम आशिल्ली. हो मुद्देमाल घेवन दुचाकी कडेन चलत वतना गस्तीचेर आशिल्ल्या पुलिसांक ते दिसले आनी तांणी तांकां ताब्यांत घेतले.
दुबावितांची झडटी घेतली तेन्ना तांचे बॅगेंत स्क्रू ड्रायव्हर, कुलूप तोडपा खातीर लोखणाची छिन्नी आनी हेर आवता, हातमोजे मेळ्ळे. डॉ पेडणेकार हाचे चिखली- वास्को हांगा रावपी चलयेन म्हापशें पुलीस स्टेशनात आपल्या बापायचें घर फोडिल्ल्याची कागाळ केल्ली. पुलीस निरीक्षक परेश नायक हांच्या मार्गदर्शना खाला उपनिरीक्षक गौरव नायक, हवालदार सुशांत चाड्डेकार, राजेश कांदोळकार, प्रकाश पोळेकार, अभिषेक कासार, अक्षय पाटली आनी आनंद राठोड हांणी चोरांक धरपाची कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
