भांगरभूंय | प्रतिनिधी
आठ दिसां भितर निर्णय घेयात; पालिकेक सहाय्यक कामगार आयुक्ताची मुजत
भांगरभूंय । प्रतिनिधी
म्हापशें: म्हापशेंच्या पालिका कर्मचाऱ्यांच्या चार्टर ऑफ डिमांड पत्राचेर 18 ऑक्टोबर मेरेन निर्णय घेवपाची मुजत सहाय्यक कामगार आयुक्तान म्हापशें पालिका मंडळाक दिल्या. ताका लागून सोमारा 10 ऑक्टोबर सावन आयोजीत केल्लो बेमुजत संप स्थगीत दवरला. वयल्या काळांत मागणी पत्राचेर निर्णय जावंक ना जाल्यार 2- ऑक्टोबर सावन कर्मचारी बेमुजत संपाचेर वतले.
शुक्रारा 7 ऑक्टोबराक पालिका कर्मचारी संघटणेच्या मागणीपत्रा संबंदीत नोटीशीचेर सहाय्यक कामगार आयुक्ता मुखार सुनावणी जाली. ह्या वेळार नगराध्यक्ष शुभांगी वायंगणकार, अखील गोंय पालिका कर्मचारी संघटणेचे अध्यक्ष केशव प्रभू, म्हापशें पालिका कर्मचारी संघटणेचे पदाधिकारी आनी कांय नगरसेवक हाजीर आशिल्ले, जाल्यार पालिका मुख्याधिकारी हाजीर रावूंक नाशिल्लो. मुख्याधिकाऱ्यान आपलो प्रतिनिधी धाडिल्लो. त्या प्रतिनिधीक संघटणेच्या प्रस्नांक फुडो करचो पडलो.
पालिका कर्मचारी संघटणेच्या मागणी पत्राचेर सहाय्यक कामगार आयुक्ता मुखार खोलायेन चर्चा जाली. पालिका मंडळान आपली बाजू मांडली. ते उपरांत ह्या मागणी पत्राचेर निर्णय घेवपाक 18 ऑक्टोबर मेरेन पालिके मुजत दिली आनी फुडली सुनावणी 19 ऑक्टोबराक निश्चीत केली.
मजगतीं, पालिका कर्मचाऱ्यांच्या 19 कलमी मागणी पत्राचे पुर्तते खातीर 21 सप्टेंबराक अखील गोंय पालिका कर्मचारी संघटणेन पालिकेक नोटीस जारी केल्ली. मागणी पत्राक मंजुरी दिली ना जाल्यार 10 ऑक्टोबर सावन बेमुजत संपार वतले, अशी शिटकावणी ते नोटिशेंत दिल्ली. पालिके सयत कामगार आयुक्त आनी हेर संबंदीत खातें मुखेली तशेंच मुख्यमंत्री आनी उपसभापती हांकां हे नोटिशेची प्रत धाडिल्ली. ते प्रमाण सहाय्यक कामगार आयुक्तान दोनूय पक्षांक नोटीस जारी करून सुनावणी घेतिल्ली.
निशेध कार्यावळ चालूच दवरपाचें निश्चीत
पालिका मंडळ मागणी पत्राचेर निर्णय घेना, हे खातीर निशेध म्हूण पालिका कर्मचाऱ्यांनी 3 ऑक्टोबराक हाताचेर काळी पट्टी बांदून कामार येवचें आनी जेवणाच्या वेळार पालिका कार्यालया मुखार उबे रावून निदर्शनां केल्लीं. मागण्यो पुराय जाय मेरेन ही निशेध कार्यावळ चालूच दवरपाचें कर्मचाऱ्यांनी थारायलां.
म्हापशेंकारां मुखार गंभीर समस्या उप्रासूं येता
सहाय्यक कामगार आयुक्तांचे मुजती प्रमाण फुडल्या आठ दिसां भितर पालिका मंडळाक पालिका कर्मचाऱ्यांच्या मागणी पत्राचेर निर्णय घेवपा खातीर विशेश बसका घेवची पडटली. हे मुजतींत जर बसका घेवन निर्णय घेतलो ना जाल्यार कर्मचारी संपाचेर वतले. तशें जालें जाल्यार म्हापशें शारांतल्या लोकांक गंभीर समस्यांक फुडो करचो पडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
