भांगरभूंय | प्रतिनिधी
उपसभापती ज्योशुआ डिसोझाः रवीन्द्र भवना खातीर यत्न
भांगरभूंय । प्रतिनिधी
म्हापशें: म्हापशेंच्या नव्या कदंब बसस्टॅण्डा वयल्या शौचालयांत सांपडिल्ल्या रित्या सिरिंजा विशीं पुलीस तपास करतात. ह्या प्रकरणाच्या मुळा मेरेन वचपाचो आमचो यत्न आसा, अशी प्रतिक्रिया उपसभापती ज्योशुआ डिसोझा हांणी दिली. म्हापश्यां आयोजीत एके कार्यावळीचे सुवातेचेर ते पत्रकारां कडेन उलयताले.
बसस्टॅण्डा वयल्या शौचालयांत सिरिंज मेळप ही गंभीर गजाल. कदंब म्हामंडळाचे अधिकारी आनी नागरी भलायकी केंद्राक लेगीत हाची म्हायती दिल्या. हो प्रकार पर्यटक प्रवाशा कडल्यान घडला काय आनीक कोणा कडल्यान हें अजून स्पश्ट जावंक ना. हाचो सोद घेवचो पडटलो. रिती सिरिंज मेळप हो गंभीर प्रकार. परतून अशे प्रकार घडचे न्हय, हे खातीर सादूर रावपाची गरज आसा. सध्या पुलीस तपास करतात, पूण अजून कांयच हाताक लागूंक ना, अशें डिसोझा हांणी सांगलें. मजगतीं, उदरगतीच्या कामा विशां उलयतना डिसोझा हांणी सांगलें, शारांत सध्या जमनी पोंदच्यान वीज केबल घालपाचें काम सुरू आसा. म्हापश्यां रवीन्द्र भवना खातीर आपूण यत्न करता. ह्या भवना खातीर दोन कडेन सुवात पळयल्या. हें काम ताकतिकेन हातांत घेवपाचो विचार आसा. पूण कामाक केन्नाच्यान सुरवात जातली, हाची हमी दिवप शक्य ना, अशें डिसोझा हांणी स्पश्ट केलें. तशेंच म्हापशें मार्केटाक आदली सुंदरताय परत मेलोवन दिवपा खातीर प्रकल्प हातांत घेतले, अशेंय तांणी सांगलें.
व्हड जापसालदारकी मेळ्ळ्याः ज्योशुआ
विधानसभेचें उपसभापती पद मेळप हें आपूण भाग्य समजता. ही एक व्हड जापसालदारकी आपल्याक मेळ्ळ्या. ह्या पदाची भुमिका ही सदांच तटस्थ आसची पडटा. सगळ्यांत विधानसभेंत उलोवपाचो समान हक्क मेळटलो, अशें उतर आपणें विधानसभेंतल्या वांगड्यांक दिलां, अशें उपसभापती ज्योशुआ डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
