म्हापशेंचो नगराध्यक्ष, उपनगराध्यक्ष फेरबदलाचो अधिकार ज्योशुआक

भांगरभूंय | प्रतिनिधी

तानावडेः फ्रान्सीस डिसोझांचे जयंती निमतान ओंपलीं आर्गां

म्हापशें: नगराध्यक्ष आनी उपनगराध्यक्ष हांच्या फेरबदला विशीं उपसभापती ज्योशुआ डिसोझा हांची मुख्यमंत्र्या कडेन चर्चा जाल्या. ह्या पदांत बदल करपा खातीर पूर्ण मेकळीक तांकां दिल्या आनी उपसभापतींचे अपेक्षे प्रमाण आनी थळाव्या भाजप मंडळाक विस्वासांत घेवन हो बदल जातलो अशी म्हायती भाजपाचे प्रदेशाध्यक्ष सदानंद शेट तानावडे हांणी दिली.

येता त्या कांय दिसांनी म्हापशें पालिकेंतले नगराध्यक्ष आनी उपनगराध्यक्ष बदलतले, हे फाटभुंयेर भाजप प्रदेशाध्यक्षांनी वयली प्रतिक्रिया उक्तायली. मंगळारा 4 ऑक्टोबर दिसा आदले उपमुख्यमंत्री फ्रान्सीस (बाबूश) डिसोझा हांच्या 68व्या जयंती दिसाचे कार्यावळींत तांकां आर्गां ओंपले उपरांत ते पत्रकारां कडेन उलयताले.

ह्या वेळार उपसभापती ज्योशुआ डिसोझा, नगराध्यक्ष शुभांगी वायंगणकार, उपनगराध्यक्ष चंद्रशेखर बेनकार, भाजप मंडळ अध्यक्ष नगरसेवक सुशांत हरमलकार आनी उसपभापती हांचे कुटुंब, नगरसेवक, नगरसेविका, भाजपाचे पदाधिकारी आनी कार्यकर्ते हाजीर आशिल्ले. ह्या वेळार भाजपा युवा मोर्चा म्हापशें मंडळा वतीन रक्तदान शिबीर, कोवीड वासिनीकरण आनी वैजकी शिबिराचें आयोजन केल्लें.

बाबूश डिसोझा हांची याद ताजी करतना तानावडेन म्हणलें, बाबूश हे लोकप्रीय फुडारी आशिल्ले. तांच्या सभावाक लागून म्हापशें तशेंच गोंयांत तांचो प्रभाव आशिल्लो. बाबूश हांणी अल्पसंख्यांक समाजा मुखार भाजपाची बाजू सदांच बरे तरेन मांडल्या. ताका लागून देशभरांतल्या भाजपा फुडाऱ्यां सयत लोकां मदीं बाबूश हे एक वळखीचें व्यक्तीमत्व आशिल्ले.

उपसभापती ज्योशुआ डिसोझान म्हणलें, बाबूश हे सदांच लोकांच्या उल्याक पावपी व्यक्तीमत्व आशिल्ले. ताका लागून लोकांच्या मनांत आयजूय तांचे खातीर आदर आसा. तांच्या वाडदिसा सदांच लोक व्हड संख्येन घरा येवन तांकां शुभेच्छा दिताले.

गोंयांतले कायदो सुवेवस्थे विशीं उलयतना सदानंद शेट तानावडेन म्हणलें, विरोधकांक उलोवपा खातीर कांय विशय जाय आसतात. हे विशीं मुख्यमंत्र्यांनी पुलिसां बरोबर बसका घेवन तांकां गरजेचे ते निर्देश दिल्यात. गरजे भायर वावड्यो पातळावन टिका करप योग्य नासता. उदकाच्या बिलाची दरवाड कितली जाल्या हाची कल्पना म्हाका ना, ते खातीर हांव त्या विशयाचेर उलोवंक शकना.