म्हापशेंचे जामा मशिदीची वेंचणूक 11 सप्टेंबराक

समितींतल्यान काडिल्ले विरोधी गटांतले वांगडी आनी समितीचे अध्यक्ष फिरोज कटवेलिया हांचें म्हणणें आयकून घेतना पुलीस निरिक्षक परेश नायक आनी मामलेदार शैलेंद्र देसाय. (उमेश झर्मेकार)

भांगरभूंय | प्रतिनिधी

पुलीस बंदोबस्तांत बसका; विरोधी गटांतल्या वांगड्यांक प्रवेश न्हयकारलो

भांगरभूंय । प्रतिनिधी

म्हापशें: आंगड म्हापशेंचे जामा मशीद समितीची वेंचणूक 11 सप्टेंबराक घेतले. हो निर्णय आयतारा जाल्ले वर्सुकी साबार बसकेंत घेतलो. पुलीस बंदोबस्तांत ही बसका जाली. विरोधी गटाच्या कांय वांगड्यांक हे बसकेंत प्रवेश न्हयकारलो.

म्हापशेंच्या मयूर हॉटेलाच्या सभाघरांत मशिदीचे अध्यक्ष फिरोज कटवेलिया हांचे अध्यक्षते खाला ही साबार बसका जाली. समितीचो कार्यकाळ 31 मार्चाक सोंपिल्लो, ताका लागून नवे समिती खातीर वेंचणूक घेवचे खातीर लिकायत फतारी हांचे अध्यक्षते खाला पांच वांगड्यांचे वेंचणूक समितीची निवड केली. बसकेक समितीचे पदाधिकारी आनी वांगडी व्हड संख्येन हाजीर आशिल्ले.

19 जूनाक जाल्ले मशिदीचे साबार बसकेंत विरोधी गटान बोवाळ केल्लो. ताका लागून बसका बरखास्त करची पडिल्ली. 24 जुलयाक आपयिल्ले साबार बसकेक असो बोवाळ परतून जावचो न्हय, हे खातीर पुलिशेचो खर बंदोबस्त दवरिल्लो. बार्देसाचे संयुक्त मामलेदार शैलेंद्र देसाय, पुलीस निरिक्षक परेश नायक, उपनिरिक्षक विरोज कोरगांवकार, बाबलो परब, उपनिरिक्षक विभा वळवयकार हांच्या फुडारपणा खाला पुलीस पंगड घडणुकेचे सुवातेचेर हाजीर आशिल्ले.

विरोधी गटांतले फिरोज खान, अब्दुल खालीद हांचे सयत हेरांक हे बसकेंत प्रवेश दिवंक ना. ह्या वांगड्यांक समितीन काडून उडयल्यात केल्यात. ताका लागून तांकां बसकेंत हाजेरी लावपाक मेळची ना, अशें मशिदीचे अध्यक्ष फिरोज कटवेलिया हांणी पुलिशेक सांगलें. ते प्रमाण म्हापशें पुलिसांनी ह्या गटाक बसका आशिल्ल्या हॉटेला भायर आडायले. तांचे कांय प्रस्न आसा जाल्यार तांणी न्यायालयांत वच्चें, अशी सुचोवणी तांकां संयुक्त मामलेदार शैलेंद्र देसाय आनी पुलीस निरिक्षक परेश नायक हांणी केली. हाका लागून वातावरण कांय प्रमाणांत तापलें.

विरोधी गटाचें फुडारपण करपी फिरोज खान हांणी दावो करतना सांगलें, फाटली बसखास्त केल्ली साबार बसका आयज परतून घेतात. मुळांत मशीद समितीच्या कायद्यांत अशी तजवीज ना. हे जामा मशीद समितींत बार्देसांतले वांगडी आसात. सध्या पंचायत वेंचणूक आचारसंहिता लागू आसा. अशा वेळार ही बेकायदोपणान बसका घेतात. आमी समितीचे नोंद आशिल्ले वांगडी आसात, तरीय आमकां बसकेंत वांटो घेवपाक दिनात. बसकेक वचपाची मागणी आमी पुलिशे कडेन केली, पूण आमचें कांयच आयकून घेवंक ना. सध्याचे समितीची हुकूमशाय चल्ल्या. नोंद आशिल्ल्या वांगड्यांक ते तांच्या हक्का पसून पयस दवरतात, असो आरोप फिरोज खान हांणी केलो.

उच्च न्यायालयांत याचिकाः फिरोज खान

आमकां समितींतल्यान काडल्यात, असो दावो समिती करता. हे संबंदांत आपल्याक वा हेरांक नोटीस मेळूंक ना. दुसरे वटेन हे साबार बसके विशीं आमी उच्च न्यायालयांत याचिका दाखल केल्या. 25 जुलयाक सुनावणी आसा, अशें विरोधी गटांतले फिरोज खान हांणी सांगलें.

बसकेंत विवीध मुद्द्यांचेर चर्चाः कटवेलिया

पुलीस संरक्षणांत साबार बसका शांततायेन जाली. ज्या वांगड्यांक समितींतले काडल्यात, तांकां बसकेंत वांटो घेवंक दिवंक ना. आमकां मामलेदार तशेंच पुलिसांचो बरो आदार मेळ्ळो. बसकेंत विवीध मुद्द्यांचेर चर्चा जाली, अशें अध्यक्ष फिरोज कटवेलिया हांणी सांगलें.