म्हादय सांबाळपाक रस्त्यार देंवपाक तयार

बोरी ग्रामसभेंत उलयतना सरपंच दुमींग वाझ. कुशीक पंचायत सचीव रजत नार्वेंकार आनी हेर पंच वांगडी.

भांगरभूंय | प्रतिनिधी

बोरये ग्रामसभेंत थाराव मंजूर; अमीत शाह हांच्या विधानाचो निशेध

भांगरभूंय । प्रतिनिधी

मडगांवः बोरी पंचायतीचे ग्रामसभेंत म्हादय न्हंयेच्या अस्तित्वा विशीं लोकांनी हुस्को उक्तायलो. सध्याचें सरकार, मंत्री, आमदार हांचेर आरोप करून म्हादय सांबाळपा खातीर रस्त्याचेर देंवपाची तयारी लोकांनी ग्रामसभेंत दाखयली आनी तशा आशयाचो थाराव मंजूर केलो. आयतारा पंचायत कार्यालयांत ही ग्रामसभा जाली.

ह्या वेळार उत्कर्षबोरकार, प्रकाश नायक, देवानंद फडते, राहुल नायक, समीर नायक, योगानंद बोरकार, डेव्हीड गोमीश, राजेंद्र नायक, शैलेश नायक आनी हेरांनी म्हादय न्हंये संबंदांत जाल्ले चर्चेंत वांटो घेतलो. तशेंच केंद्रीय गृहमंत्री अमीत शाह हांणी बेळगांवी जाल्ले जाहीर सभेंत केल्ल्या विधानाचो निशेध केलो.

ह्या वेळार माचयेर जिल्हो पंचायत वांगडी दीपक नायक बोरकार, सरपंच दुमींग वाझ, उपसरपंच किरण नायक, पंच भावना नायक, जयेश नायक, विनय बोरकार, रश्मी नायक, संगिता गावडे, सुनील बोरकार, सतीश नायक, विनय पारपती, निरिक्षक रुपाली पै हाजीर आशिल्ली.

म्हादय न्हंयेच्या प्रस्नाचेर सरपंच, उपसरपंच आनी सगळ्या पंचांनी आपूण लोकां वांगडा आशिल्ल्याचें सांगलें. पंचायत सचीव रजत नार्वेंकार हांणी फाटले बसकेचो इतिवृंतांत वाचून दाखयलो. सरपंच वाझ हांणी येवकार दितना विवीध उदरगतीच्यो येवजण्यो आनी उदरगतीच्या कामां विशीं म्हायती दिली. हे बसकेंत कलमामळ मैदान, देवूळवाड्या वयली मसुंडी, बोरी गांवांतले स्पीड ब्रेकर्स, सिद्धनाथ पर्वताचेर सुरू आशिल्लें काम, गांवांतले रस्ते, वीज समस्या, कोळसो येरादारी, पर्यटन धोरण, बायथाकोल वाठारांत सुरू आशिल्लें बांदकाम आनी हेर विशयांचेर सुमार साडेचार वरां चर्चा जाली.