म्हादय समस्येक काँग्रेस, भाजप जापसालदार : आरजी

भांगरभूंय | प्रतिनिधी

कोणाचोच तेंकाे घेनासताना स्वतंत्रायेन आंदोलनाचो निर्णय

पणजी : म्हादयच्या समस्येक भाजप आनी काँग्रेस हे दोनूय पक्ष जापसालदार आसात. म्हादय विशींचो अहवाल सादर करपाक सरकाराक अपेस आयलां. आरजी पक्ष म्हादय खातीर स्वतंत्रायेन आंदोलन करतलो. कोणाचोच तेंको घेवचो ना अशें आरजीचे मुखेली मनोज परब हांणी स्पश्ट केलां.

आरजीची आयतारा सांजे आझाद मैदानार सभा जाली. हे सभेक उपाट प्रतिसाद मेळ्ळो. जाहीर सभेंत आंदोलनाच्या जाहीरनाम्याचें वाचन जालें. फोंड्यांचें विश्वेश नायक हांणी अदमाशेक वीस मिनटां वाचन केलें. आरजीचे मुखेली मनोज परब हांणी म्हादयचे उदक घुंवडायलें जाल्यार कितें परिणाम जातलो? ताचे सादरीकरण केलें. राज्यांतल्या स म्हालाक फटको बसतलो. जागृताय करपा सयत सयांची मोहीम आरजी सुरू करतलो.

काँग्रेस, भाजप सयत मनोज परब हांणी गोवा फॉरवर्ड तशेंच आपाचेर फोग काडलो. आदले मुख्यमंत्री सर्गेस्त मनोहर पर्रीकार हांचेर लेगीत तांणी फोग काडलो. दुरदिश्टी आशिल्ले पर्रीकार हांणी म्हादय सोंपापाची दुरदिश्टी दाखयली अशें तांणी म्हणले. शेनवारा राष्ट्रीय स्वयंसेवक संघाचे मुखेली मोहन भागवत हांची सभा जाली. मोहन भागवत हांणी भाशणांत म्हादयचो उल्लेख लेगीत करूंक ना. आरएसएसाचे हे कृतीचेर तांणी टिका केली. विरोधांत आसतना रोहन खंवटे हे मुख्यमंत्री डॉ. प्रमोद सावंत हांचो उल्लेख पप्पू असो करताले. आता तेच पप्पू जाल्यात अशी टिका तांणी खंवटे हांचेर केली.

ह्या राजकारण्यांनी म्हादय न्हंय कर्नाटकाक विकून गोंयकारांक फटयल्यात. म्हादय वळोवपाचे परिणाम आमकां रोखडेंच जाणवतले. राज्यांत गोड्या उदकाची पुरवण सोंपपाची आसा आनी लोक गोड्या उदका खातीर झगडटले, शेती आनी बागायती नश्ट जातली. लोक एकठांय येवपाची गरज आसा अशें मनोज परब हांणी हे बसकेंत आवाहन केलें.

हे राष्ट्रीय राजकी पक्ष म्हादयचो प्रस्न सोडोवंक शकनात देखून आमी एकठांय येवचें पडटलें. हे राजकी पक्ष कर्नाटकांत आपली राजकी पोळी भाजून घेवपाक लागल्यात. आमची म्हादय, हे पक्ष मतां खातीर विकपाक तयार आसात. हे खातीर आमी एकठांय येवपाची गरज आसा अशें आमदार विरेश बोरकार हांणी सांगलें.

ह्या राष्ट्रीय पक्षाचे फुडारी आपलेच फायदे सोदतात. म्हादय वळयल्यार गोंयच्या पर्यावरणाचेर परिणाम जातलो. लोकांक उदका खातीर झगडचें पडटलें. हे राजकी फुडारी त्या वेळार कांयच करचे नात. ते खातीर लोकांनी आतांच सावध भुमिका घेवची अशें बोरकार हांणी सांगलें.

राज्यांत तीन खासदार आसात, पूण ह्या विशयाचेर कोणूच आवाज काडिनात. सगलेच आपली सुवात सांबाळून आसात. भाजपाचे 33 आमदार आसात. ते आमदार कित्याक बोवाळ करिनात? तशेंच मुख्यमंत्री डीपीआर दितना खंय आशिल्ले? तांकां हे विशीं कसलीच म्हायती कित्याक मेळ्ळी ना? सामान्य लोक अशे जायते प्रस्न विचारतात. आतां म्हादयचो प्रस्न चालू आसा पूण हें सरकार अजून गंभीर ना. म्हादयचेर श्वेतपत्रिका तशेंच सभाघर समिती तयार करची अशी मागणी आमी ह्या सरकाराक केल्या अशें बोरकार हांणी सांगलें.