भांगरभूंय | प्रतिनिधी
केंद्राचेर चेपण हाडटलेः तानावडे
पंचायतींक थाराव घेवपाचें आवाहन, प्रधानमंत्र्यांक भेटयतलें निवेदन
प्रदेश भाजप राबयतली सयांची मोहीम
भांगरभूंय I प्रतिनिधी
पणजी : केंद्रीय जल आयोगान कळसा-भांडुरा खातीर कर्नाटकाच्या सविस्तर प्रकल्प अहवालाक (डीपीआर) दिल्ली मंजुरी फाटीं घेवपाचो थाराव भाजप गाबो समितीन सोमारा बसकेंत मंजूर केलो. हो थाराव प्रधानमंत्री नरेंद्र मोदी, गृह मंत्री अमीत शाह तशेंच भाजपाध्यक्ष जे. पी. नड्डा हांकां बेगिनूच सादर करतले, अशें भाजप प्रदेशाध्यक्ष सदानंद शेट तानावडे हांणी मंगळारा सांगलें.
पणजे भाजप कार्यालयांत घेतिल्ले पत्रकार परिशदेंत ते उलयताले. आदले खासदार नरेंद्र सावयकार ह्या वेळार हाजीर आशिल्ले. कर्नाटकाच्या डीपीआराक मान्यताय दिवन केंद्रीय जल आयोगान एकतर्फी निर्णय घेतला. म्हादय हो गोंयकारांच्या स्वाभिमानाचो विशय आशिल्ल्यान ह्या प्रस्नाचेर गोंयचेर अन्याय जाल्ल्याची भावना दरेक गोंयकारां मदीं आसा. ताका लागून प्रदेश भाजपान हो निर्णय केंद्रा कडेन मांडपाचे निश्चीत केला.
ते फाटभुंयेर कर्नाटकाच्या डीपीआराक दिल्ली मंजुरी फाटीं घेवपाचो थाराव भाजप गाबो समितीन घेतला, अशें तानावडे हांणी म्हणलें. म्हादय सगल्यां खातीरूच जीवनदायिनी. ताका लागून ह्या प्रस्नाचेर सगल्याच गोंयकारांनी एकवटीत जावन लढो दिवप गरजेचें. ते खातीर राज्यांतल्या सगल्याच पंचायतीनीय डीपीआराक दिल्ली मंजुरी फाटीं घेवपाचो थाराव मंजूर करप गरजेचें. ते भायर भाजपान हे विशीं राज्यभर सयांची मोहीम सुरू करपाचो निर्णय घेतला. गाबो समितीचो थाराव, पंचायतींचे थाराव आनी सयांचें निवेदन बेगिनूच प्रधानमंत्री नरेंद्र मोदी हांकां भेटयतले. तशेंच गोंयचेर जाल्लो अन्याय पयस करपाची मागणी तांचे कडेन करतले, अशें सदानंद शेट तानावडे हांणी सांगलें.
मजगतीं, म्हादय प्रस्नाचेर राज्य सरकार आतां मेरेन खंयच उणें पडूंक ना. सर्वोच्च न्यायालयांतल्या लढ्याक सरकारान सदांच तेंको दिवन घटमूट केला. ताका लागून ह्या विशया वयल्यान विरोधका कडल्यान जावपी आरोप निरर्थक आसात, अशी टिका नरेंद्र सावयकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
