म्हादय मोगींचीं सरकारा आड निदर्शनां

भांगरभूंय | प्रतिनिधी

म्हापशें न्हंयेच्या पात्रांत देंवून दिल्यो घोशणा

श्रीपाद नायक हांणी राजिनामो दिवन उतराक जागचें

म्हापशें: म्हादय न्हंयेच्या संरक्षणार्थ म्हादय मोगींनी काल (मंगळारा) तार पुला कुशीक म्हापशें न्हंयेच्या पात्रांत देंवून सरकारा आड घोशणा दिवन भाजप सरकाराच्या धोरणाचो निशेध केलो. तशेंच उत्तर गोंयचे खासदार श्रीपाद नायक हांणी खासदारकीचो राजिनामो दिवन आपल्या उतराक जागचें अशी मागणी केली.

भाजप सरकारान कर्नाटक वेंचणुके खातीर म्हादय न्हंयेचो सौदो केला असो आरोप निदर्शनकर्त्यांनी केलो. तशेंच मुख्यमंत्र्या सयत भाजप फुडाऱ्यांचेर टिका केली. निदर्शनकर्त्यांनी कांय वेळ पुलार रावून सरकारा आड घोशणा दिल्यो. निदर्शनां वेळार म्हादय मोगी तारी कडेन गणेश विसर्जन थळार म्हापशें न्हंयेच्या पात्रांत देंवले आनी हातांत मातयेची बुडकुली आनी फलक घेवन गोंय सरकाराचो निशेध केलो.

विजय भिकेन म्हणलें, म्हादय न्हंयचें उदक पुरायेन घुंवडायल्यार गोंयांतल्यो सगल्यो न्हंयो, झरे, व्हाळ तशेंच लोक जिणेचेर विपरीत परिणाम जातलो. आतांच लोकांक फावो तितलें उदक मेळना. म्हादयचें उदक कर्नाटकांत घुंवडायल्यार फुडारांत लोक उदका खातीर वळवळटले. आमचो लढो थांबचो ना. हाचे मुखार गांवांगांवांनी वचून आमी म्हादयच्या संरक्षणार्थ अशेच तरेन जागृताय करतले.

विश्वास नागवेंकारान म्हणलें, सरकार म्हादय विशीं फक्त दिशाभूल करता. गोंयांतल्या सगल्या लोकप्रतिनिधींनी सरकाराचेर चेपण हाडचें. न्यायालयांत याचिका घाली म्हूण कांयच जायना. सत्ताधारी लोकप्रतिनिधी हे केंद्र सरकार तशेंच म्हादय प्रस्ना विशीं कांयच उलयनात हाचे वयल्यान तांची मानसीकताय दिसून येता.

ह्या वेळार विरेंद्र शिरोडकार, प्रणव परब, मुक्तमाला शिरोडकार, सुभाष केरकार, राजेंद्र कोरगांवकार, अ‍ॅड. रोशन चोडणकार आनी हेर म्हादय मोगींनी ह्या निदर्शनांत वांटो घेतलो.

म्हादयचें उदक घुंवडायल्यार दर्याचें क्षारयुक्त उदक सह्याद्री म्हणल्यार अस्तंत घांटा मेरेन पावतलें. ताका लागून थंयची जैवविविधता नश्ट जातली. लोकजिणेचेर परिणाम जावन फुडारांत जगाच्या नकाशा वयल्यान गोंयचे नांव पुसतलें. केंद्रीय गृह मंत्र्यांनी गोंय सरकारच्या संगनमतानूच केंद्रान कर्नाटकाक म्हादयचें उदक घुंवडावपाक मजत केल्ल्याचें उलोवप केल्लें आसून भाजप सरकार आनी खासदार श्रीपाद नायक हांचो हो नैतीक पराभव आसा. ताका लागून श्रीपाद नायक हांणी उलयिल्ले प्रमाण आपले खासदीरकीचो रोखडोच राजिनामो दिवचो अशी मागणी जितेश कामत हांणी केली.