म्हादय प्रवाहा वेल्यान आतां संघर्श

भांगरभूंय | प्रतिनिधी

धा दिसांत आदेश फाटीं घेवचो; ना जाल्यार रस्त्यार: सेव्ह म्हादय

कळसा – भांडुरा प्रकल्पाक चालना : बोम्माय

कर्नाटका आड हरकती उपस्थीत करपाची संद : सुभाष शिरोडकार

पणजी : केंद्र सरकारान स्थापन केल्ल्या म्हादय प्रवाहा वेल्यान आतां गोंय आनी कर्नाटका मदीं संघर्श निर्माण जाला. म्हादय प्रवाहाक लागून कळसा – भांडुरा प्रकल्प फुडें व्हरपाक मेळटलो, अशें कर्नाटकाचे मुख्यमंत्री बसवराज बोम्माय हांणी म्हणलां. प्रवाह प्राधिकरणाक लागून कर्नाटकाच्या हरकतींचेर नदर दवरप शक्य जातलें अशें राज्याचे उदका पुरवण खात्याचे मंत्री सुभाष शिरोडकार हांणी म्हणलां. प्रवाह स्थापन करपाचो निर्णय मारक आशिल्याचो दावो करीत म्हादय खातीर रस्त्यार देंवपाचो उलो सेव्ह म्हादय, सेव्ह गोंय मंचान मारला. हाका लागून आतां म्हादय प्रवाह स्थापने वेल्यान संघर्श पेटपाची चिन्नां आसात.

म्हादय प्रस्नाचेर दर दिसा नव्यो नव्यो घडणुको घडत आसात. आरजीची म्हादय जागृताय यात्रा सत्तरीत आडावन सरकारान 144 कलम लागू केलें. 144 कलम लागू आसतना लेगीत जागृताय यात्रा शांतिकायेन करपाचो निर्णय आरजीन घेतला. आरजीच्या म्हादय जागृताय यात्रेक लागून वाद निर्माण जाता म्हणसर केंद्र सरकारान म्हादय प्रवाह स्थापन केला. म्हादय प्रवाह म्हणल्यार म्हादय उदक वेवस्थापन प्राधिकरण. ह्या प्राधिकरणाचेर गोंय सरकार, कर्नाटक सरकार, महाराष्ट्र सरकार तशेंच केंद्र सरकाराचे अधिकारी आसतले.

गोंयचेर अन्याय जावचो ना : मुख्यमंत्री

म्हादय उदका वेवस्थापन प्राधिकरण स्थापन करपाची मागणी केंद्र सरकारान मान्य केल्या. केंद्रा कडल्यान गोंयचेर अन्याय जावचो ना हें हाचें वेल्यान सिद्ध जाता अशें मुख्यमंत्री डॉ. प्रमोद सावंत हांणी सांगलें.

कळसा – भांडुराचो मार्ग मेकळो : बोम्माय

म्हादय उदका वेवस्थापन प्राधिकरण स्थापन करपाचो निर्णय योग्य आसा. प्रधानमंत्री नरेंद्र मोदी हांचे हांव उपकार मानतां. म्हादयचेर प्रकल्प उबारपाचो मार्ग आतां मेकळो जातलो. केंद्रीय मंत्रीमंडळाच्या निर्णयाक हांव येवकार दितां अशें कर्नाटकाचे मुख्यमंत्री बसवराज बोम्माय हांणी म्हणलें.

केंद्रीय खण मंत्री प्रल्हाद जोशी हांणी लेगीत प्रवाह स्थापन करपाच्या निर्णयाक येवकार दिला. म्हादय लवादान जो निवाडो दिला ताची कारवाय करप आतां शक्य जातलें अशें केंद्रीय मंत्री प्रल्हाद जोशी हांणी म्हणलें.

कर्नाटकाच्या हरकतींचेर नियंत्रण

दवरप जातलें शक्य : सुभाष शिरोडकार

म्हादय उदका वेवस्थापन प्राधिकरण स्थापन करपाची गोंय सरकारान मागणी केल्ली. ही मागणी मान्य जाल्या. म्हादयचें उदक घुंवडावपा खातीर कर्नाटक सरकार ज्यो हरकती करता ताचेर नियंत्रण दवरप शक्य जातलें अशें गोंयचे उदका पुरवण खात्याचे मंत्री सुभाष शिरोडकार हांणी म्हणलें. निर्णयाक येवकार दिवपा बगर हेर पर्याय कर्नाटका कडेन ना, म्हूण कर्नाटकान निर्णयाक येवकार दिला.

प्रवाह गोंयच्या हिताचो ना, आतां रस्त्यार

देंवपाची गरज : सेव्ह म्हादय, सेव्ह गोंय

म्हादय उदका वेवस्थापन प्राधिकरण वा प्रवाह स्थापन करपाचो निर्णय गोंयच्या हिताचो ना. कळसा – भांडुरा प्रकल्पाक चालना दिवपी हो निर्णय आसा असो आरोप सेव्ह म्हादय सेव्ह गोवा मंचान केला. हो आदेश फाटीं घेवपाची मागणी सेव्ह म्हादय, सेव्ह गोवा मंचान केल्या. म्हादय वाटावपा खातीर गोंयकारांनी आतां रस्त्यार देंवपाची गरज आसा अशें सेव्ह म्हादय सेव्ह गोवा मंचान म्हणलां. मंचाचे पदाधिकारी महेश म्हांब्रे, अॅड. हृदयनाथ शिरोडकार, प्रशांत नायक हांणी पत्रकार परिशद घेवन हो उलो मारला.

डीपीआरचें लक्ष दुसरी कडेन

घुंवडावपाचो यत्न : विजय सरदेसाय

कळसा – भांडुरा प्रकल्पाचो डीपीआर रद्द करपाची मागणी आशिल्ली. डीपीआरा वेल्यान दुसरी कडेन लक्ष घुंवडावपा खातीर प्रवाह प्राधिकरण स्थापन केला असो आरोप विजय सरदेसाय हांणी केलाे.