भांगरभूंय | प्रतिनिधी
सोमारा जावपी विर्डेतले जाहीर सभेक उक्तो तेंको
पणजी : म्हादय प्रस्नाचेर सोमारा ‘सेव्ह म्हादय, सेव्ह गोवा’ ह्या बावट्या खाला विर्डे आयोजीत केल्ले बसके खातीर विरोधी काँग्रेस, आप, गोवा फॉरवर्ड, राष्ट्रवादी काँग्रेस, तृणमूल काँग्रेस आनी शिवसेना हे राजकी पक्ष एका बावट्या खाला आयल्यात. रिव्हॉल्युशनरी गोवन्सान (आरजी) मात स्वतंत्र चूल मांडल्या.
काँग्रेस प्रदेशाध्यक्ष अमीत पाटकार, आपचे राज्य संयोजक अमीत पालेकार, गोवा फॉरवर्डाचे अध्यक्ष तशेंच आमदार विजय सरदेसाय, राष्ट्रवादी काँग्रेसचे प्रदेशाध्यक्ष जुझे फिलीप डिसोझा, तृणमूलचे राज्य निमंत्रक समील वळवयकार आनी शिवसेनेचे राज्य मुखेली जितेश कामत हांणी शेनवारा पणजेंतल्या आझाद मैदानाचेर पत्रकार परिशद घेवन विरोधी पक्षांचो सोमारा विर्डे जावपी बसकेक पुराय तेंको आशिल्ल्याचे जाहीर केले.
गोंयची जीवनदायिनी आशिल्ल्या म्हादय न्हंयेचें उदक कर्नाटकान घुंवडायिल्ल्याचे स्वता मुख्यमंत्री डॉ. प्रमोद सावंत हांणीच जाहीर केला. कर्नाटका कडल्यान उदक घुंवडावपाचें कारस्थान हाचे मुखारूय चालू उरल्यार ताचे गोंयचेर भिरांकूळ परिणाम जातले, ताका लागून सगल्या प्रकाराचे मतभेद विसरून गोंयकारांनी संघटीत जावचे आनी म्हादय खातीरच्या लड्याक घटाय दिवची, अशें आवाहन सरदेसाय हांणी केलां.
‘सेव्ह म्हादय, सेव्ह गोवा’ मोहीम बिगर राजकी संघटणांनी सुरू केल्या. ताका लागून गोंयचो नागरीक ह्या नात्यान दरेकल्यान हे मोहिमेंत वांटेकार जावप गरजेचें, अशें अमीत पाटकार हांणी म्हणलें.
म्हादय न्हंय कर्नाटकाक विकपाचो सरकारान आंखिल्लो डाव आमी कशेंच येसस्वी जावपाक दिवचे नात, असो निश्चेव आपच्या अमीत पालेकार हांणी केला. हेर पक्षांच्या राज्य मुखेलींनीय हाचे वयल्यान सरकाराचेर टिका करीत सोमारा जावपी बसकेक सगल्यांनी हाजीर रावचे, अशें आवाहन केलां
म्हादय बचाव अभियानाचो तेंको
विर्डेंत सोमारा जावपी बसकेक म्हादय बचाव अभियानाचो पुराय तेंको आसतलो. अभियानाचे सगले पदाधिकारी बसकेक हाजीर रावतले, अशी म्हायती अभियानाची अध्यक्ष निर्मला सावंत हांणी आमच्या प्रतिनिधी कडेन उलयतना दिली. म्हादय न्हंय वाटावपाक राज्यभर मोट्या प्रमाणांत जागृताय जावप गरजेचें, अशें तिणें नमूद केले. ‘गाकुवेध’ संघटणेचोय हे बसकेक तेंको आसतलो.
‘आरजी’च भाजपाची ‘बी टीम’
हेर विरोधी पक्षां वांगडा वचनासतना स्वतंत्रपणान राज्यभर कोनसो बसका घेवन लोकांक म्हादय न्हंयेचें म्हत्व समजावन दितले, अशें रिव्हॉल्यूशनरी गोवन्सान (आरजी) थारायिल्ल्याची म्हायती संस्थापक मनोज परब हांणी दिली. हाचे वयल्यान म्हादय खातीर सगल्यांनी संघटीत जावपाची गरज आसतना आरजी मात स्वतंत्रपणान वता. भाजपा खातीर अनुकूल वातावरण तयार करता. लाका लागुनूच होच पक्ष भाजपाची ‘बी टीम’ आशिल्ल्याचो आरोप विरोधी पक्षांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
