भांगरभूंय | प्रतिनिधी
दिल्ली भेटी उपरांत मुख्यमंत्री डॉ. प्रमोद सावंत हांकांय विस्वास
भांगरभूंय I प्रतिनिधी
पणजी : म्हादय प्रस्नाचेर गोंयच्या शिश्टमंडळा वांगडा आपली सविस्तर चर्चा जाल्या. ह्या प्रस्नाचेर निश्चीत सकारात्मक उपाय काडटले, असो विस्वास केंद्रीय जलशक्ती मंत्री गजेंद्रसिंग शेखावत हांणी बिरेस्तारा उक्तायला.
कळसा-भांडुरा प्रकल्पा संदर्भांत कर्नाटकान सादर केल्ल्या डीपीआराक केंद्रीय जल आयोगान मंजुरी दिले उपरांत गोंयांत खवदळ पडला. विरोधी पक्षांनी हाचे वयल्यान सत्ताधारी भाजप सरकाराचेर टिका सुरू केल्या. म्हादय खातीर जायतीं वर्सां न्यायालयीन लढो दिवपी पर्यावरण मोग्यांनीय हे विशीं नाराजी उक्तायल्या. ताका लागून ह्या प्रस्नाचेर शिश्टमंडळा सयत प्रधानमंत्री नरेंद्र मोदी, गृह मंत्री अमीत शाह तशेंच जलशक्ती मंत्री गजेंद्रसिंग शेखावत हांची भेट घेवन गोंयची बाजू तांचे मुखार मांडपाची आनी जल आयोगान कर्नाटकाक दिल्ली मंजुरी फाटीं घेवपाची विनवणी करपाचो निर्णय मुख्यमंत्री डॉ. प्रमोद सावंत हांणी कांय दिसां पयलीं घेतिल्लो.
गोंयच्या शिश्टमंडळाक प्रधानमंत्री मोदी हांची भेट मेळूंक ना. ताका लागून मुख्यमंत्री डॉ. सावंत हांणी बुधवारा केंद्रीय मंत्री श्रीपाद नायक, राज्यसभा खासदार विनय तेंडुलकार, सभापती रमेश तवडकार, उदकास्रोत मंत्री सुभाष शिरोडकार, पर्यावरण मंत्री नीलेश काब्राल, रान मंत्री विश्वजीत राणे, येरादारी मंत्री माॅवीन गुदिन्हो, वीज मंत्री सुदिन ढवळीकार आनी आमदार डॉ. चंद्रकांत शेट्ये हांच्या शिश्टमंडळा सयत बुधवारा दिल्लींत वचून गृह मंत्री अमीत शाह हांची भेट घेतली आनी केंद्रीय जल आयोगान कळसा-भांडुरा प्रकल्पा खातीरच्या कर्नाटकाच्या ‘डीपीआर’क दिल्ली मंजुरी फाटीं घेवपा सयत म्हादय उदका प्राधिकरण बेगिनांत बेगीन स्थापन करपाची मागणी केली.
ते उपरांत ह्या शिश्टमंडळान शेखावत हांची भेट घेवन कर्नाटकान म्हादयचें उदक घुंवडायल्यार ताचो गोंयचेर कसो परिणाम जावपाक शकता हे मुख्यमंत्री डॉ. प्रमोद सावंत तांकां सांगलें.
मुख्यंमंत्री डॉ. प्रमोद सावंत म्हणटात…
केंद्रीय गृह मंत्री अमीत शाह आनी जलशक्ती मंत्री गजेंद्रसिंग शेखावत हांकां आपूण म्हादय विशीं गोंयची बाजू समजावन सांगल्या.
कर्नाटकान कळसा-भांडुराचें काम सुरू केल्यार गोंयांतल्या लोकांक पिवपाचें उदक मेळप कठीण जातले. तशेंच ताचो पर्यावरण, अभयारण्याचेर कसो परिणाम जातलो हाची सविस्तर म्हायती दिली. ताका लागून शाह आनी शेखावत निश्चीत गोंयाक थाकाय दिवपी निर्णय घेतले.
म्हादय संदर्भांत सर्वोच्च न्यायालयांत सुरू आशिल्लो लढो कायम उरतलो. तशेंच केंद्रा कडल्यान आमी दोनूय मागण्यो मान्य करून घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.