म्हादयचें राजकारण तापता

भांगरभूंय | प्रतिनिधी

हे फावट आतांचे विरोधी फुडारी सत्ता मेळोवपाक आनी आपलें सादोवन घेवपाक हे चळवळीचो वापर करून घेवचेनात हाची जतनाय आमकां घेवचीच पडटली. आनी जर घेतली ना जाल्यार……

कर्नाटकाच्यो म्हादय संबंदांतल्यो येवजण्यो 1985 सावन सुरू  जाल्ल्यो म्हणपाचें आयकतां. 1998 त कळसा आनी भांडुरा
प्रकल्प बांदपाचो कर्नाटकाचो प्रस्ताव येत सावन ह्या वादाक तोंड फुटलें. तेन्ना सावन आयज मेरेन खंयच्याच सरकारांनी आनी राजकी पक्षांनी म्हादय वादाक जाय तितलें म्हत्व दिलें ना. वेंचणुकेचो, एकामेकांक थोमणे मारपाचो आनी उजरावन काडपाचो मुद्दो म्हूण वापर करपाचे सोडून तेन्नाचे ते आयज मेरेनचे सगलेच राजकारणी आपल्याक तें लागना, हेच तरेन वागले.
2018 वर्सा म्हादयच्या उदका खातीर स्थापन जाल्ल्या लवादान दिल्ल्या निर्णयाचें केंद्र सरकारान सविस्तर प्रकल्प अहवालाक (डी. पी. आर.) परवानगी दिले उपरांत परत एक फावट हो वाद तेंगशेर आयला.
केंद्र सरकाराचें राजकारण
म्हादयच्या आस्थे परस राजकारणाचो वास ह्या प्रकरणांत चड येता. 14 ऑगस्ट 2018 वर्सा जाल्ल्या निर्णयाच्या सविस्तर प्रकल्प अहवालाक (डी. पी. आर.) परवानगी कर्नाटकांतली विधानसभेची वेंचणूक लागीं पावतकूच चार- साडेचार वर्सांनी दिवप जाता. तेन्ना त्या वाठारांतले वेंचणुकेचेर नदर दवरुनूच तो दिला म्हणपाचें सिद्ध जाता. लोकसभेंत कर्नाटकाचे आशिल्ले 28 खासदार विरुद्ध गोंयचे 2 खासदार हांचो फायदो पळयल्यार तांचो पुराय मोग कर्नाटका वटेन उरतलो हें आनी सांगपाक नाका.
विरोधी पक्षाचें राजकारण
लवादाच्या ह्या निर्णया प्रमाण, 1.72 टीएमसी आनी 2.18 टीएमसी अशें वट्ट 3.9 टीएमसी उदक कर्नाटकाक दुसरे कडेन व्हरपाची मेकळीक दिल्या. त्या निर्णयाचेर आदारून केंद्र सरकारान सविस्तर प्रकल्प अहवालाक (डी. पी. आर.) परवानगी दिल्या म्हणपाची म्हायती मेळटा. सविस्तर प्रकल्प अहवालाक (डी. पी. आर.) परवानगी दितकूच विरोधक खडबडून जागे जाले, जे लवादान दिल्ल्या निर्णया वेळार वो ह्या विशयाचेर वेगळ्या वेगळ्या वेळार, वेगळ्यो वेगळ्यो घडणुको जाल्यो तेन्ना जागे जावपाक जाय आशिल्ले. ह्या सविस्तर प्रकल्प अहवालाच्या (डी. पी. आर.) परवानगीचो फायदो घेवन तांणी सत्ताकार पक्षाचेर पुराय तोंडसूख घेतलें. म्हादय खंय सावन व्हांवता आनी तिचे प्रस्न कितें हें समजून घेनासतना लेगीत थोड्यांनी आपलो ठसो उमठायलो.
सत्ताकार पक्षाचें राजकारण
सत्ताकार पक्षान सविस्तर प्रकल्प अहवालाक (डी. पी. आर.) परवानगी दितकूच जिवाच्या आकांतान हातपांय बडयत कितें तरी केल्ल्याचें जनतेक भासयलें. हेर पक्ष ह्या म्हादय विशयांत कशे दोशी आसात आनी तांकां कित्याचेंच पडून वच नासतना ते कशे प्रत्येक गजालीचें राजकारण करतात, तें लोकांक सांगलें. धांव धांव करून दिल्ली वचून कितल्या कश्टान गोंयची बाजू केंद्रीय घर मंत्री अमीतबाब शहा हांचे मुखार मांडली आनी कोणा कोणाक मेळ्ळे तेंवूय लोकांक सांगलें. तेच बरोबर लोकशायेंतल्या विरोधकांचो विरोध रडीच्या डावान कशे तरेन पोक करपाक जाता, हाचेर पुराय यत्न केले.
विरोध कित्या खातीर करपाक जाय ?
मेळिल्ले म्हायती वयल्यान म्हादय वाठार 2003 चौखण किलोमिटर आसा. तातूंतलो सादारण लागीं लागीं 75 चाैखण किलो मिटर महाराष्ट्रांत, लागीं लागीं 350 चाैखण किलोमिटर कर्नाटकांत आनी उरिल्लो वाठार गोंयांत आसा. ह्या वाठारांत सादारण 188 टीएमसी उदक आसा अशी म्हायती मेळटा. हातूंत कर्नाटक कळसा आनी भांडुरा ह्यो उपन्हंयो, ज्यो म्हादय न्हंयेक मेळटात तांचेर बांद घालपाक सोदता आनी त्या उदकाची झोत बदलून थंयच्यान ती मलप्रभा न्हंयंत व्हरपाक सोदता. तांणी ते तरेचें काम सुरूय केलां. हें करतना ते कोणाचीच पर्वा करिनात. कायद्याची, सर्वोच्च न्यायालयाची आनी केंद्र सरकाराचीय.
ह्यो उपन्हंयो पश्चीम घाटांत आसात, ज्यो एक तर रानांजीव अभयारण्यांतल्यान व्हांवतात वो म्हादय न्हंयेक मेळटात जी रानांजीव अभयारण्यांतल्यान व्हांवता. ह्यो न्हंयो वो उपन्हंयो भीमगड, म्हादय, महावीर आनी हेर रानांजीव अभयारण्यांतल्यान व्हांवतात. कायद्या प्रमाण जी न्हंय रानांजीव अभयारण्यांतल्यान व्हांवता तिचो प्रवाह आडावपाक वो बदलपाक मेळना. कर्नाटक राज्य हो कायदो भिसक्यार मारता. म्हूण गोंयकारांनीच न्हय तर पुराय भारतांतल्यान हाका विरोध जावपाक जाय. ह्या न्हंयांच्या उदकाचेर जी जिवावळ आनी सैम निंबून आसा तो सांबाळपाक विरोध जावपाक जाय.
188 टीएमसींतल्यान 3.9 टीएमसी उदक कर्नाटकांत थंयच्या लोकांक पिवपाक जाय म्हूण गेलें म्हूण व्हडलो फरक पडना, अशेंय म्हणपी लोक आसात. पूण ज्या सुवातींतल्या लोकांक पिवपाचें उदक ना म्हूण कर्नाटक बोवाळ मारता, त्याच सुवातींनी थंयचे लोक ऊसाची लागवड करतात, जाका उदकाची चड गरज लागता. हें सगल्या शेतकारांक खबर आसतलें. म्हणल्यारूच कर्नाटक फट मारता. म्हणून हाका विरोध जावपाक जाय.
जेन्ना गोंयची बाजू मांडपाक सत्ताकार पक्ष केंद्रीय घर मंत्री अमीतबाब शहा हांकां मेळ्ळे आनी जे तरेन केंद्रीय घर मंत्र्यान गोंयकारांचीं खेबाडां केलीं, गोंयच्या आंदोलकांचीं खेबाडां केलीं हाका खरें तर माफी फावना. म्हणूय हाका विरोध
जावपाक जाय.
केंद्र सरकार फकत वेंचणुकेचेर नदर दवरून राजकारण करता. जें राज्य इतिहासीक कारणाक लागून ल्हान उरलां आनी आपल्या ल्हान आकारमानाक लागून हेरांचेर निंबून उरलां त्या राज्याक घटसाण दिवपाची सोडून 28 x 2 अशें राजकी गणीत करून भुमिका घेता, ताकाय लागून हाका विरोध जावपाक जाय.
विरोध जातना आनी एकठांय येतना आमी सादूर रावचेंच पडटलें. 2012 ची माध्यम चळवळींत वांटेकार जावन भाजपान सत्ता मेळयली आनी चळवळीक उबंत उडयली, ही देख दोळ्यां मुखार आसा. हे फावट आतांचे विरोधी फुडारी सत्ता मेळोवपाक आनी आपलें सादोवन घेवपाक हे चळवळीचो वापर करून घेवचेनात हाची जतनाय आमकां घेवचीच पडटली. आनी जर घेतली ना जाल्यार सामान्य लोक चळवळ करपाक मुखार येवचो ना.

चेतन आचार्य
8830103768