भांगरभूंय | प्रतिनिधी
इंस्टाग्राम, फेसबूक, स्नॅपचॅट, ट्विटर, रेडिट, लिंक्डइन…आयज संवरांत चडशे लोक हातूंतलो एक तरी सोशल मीडया अॅप वापरतातूच. ताका लागून ताण, हुस्को, निर्शेवणी हे सारकिल्ल्या मानसीक दुयेसांक लोक बळी पडटात. ह्या दुयेंसांक आळाबंद हाडचे पासत भलायकी तज्ञ ‘डिजिटल डिटोक्स’ हे संकल्पनेचो अभ्यास करतात.
हालींच, इंग्लंडाच्या बाथ विद्यापीठांतल्या संशोधकांनी एका सोदवावरांत सांगलां की, सोशल मिडिया कडल्यान फकत एक आठवडोच पयस रावत जाल्यार तुमची मानसीक भलायकी सुदारपाक शकता. म्हणल्यार जर तुमी उदासीनता, निराश आनी हुस्को ह्या लक्षणां कडेन झूज दितात जाल्यार हें सगलें फकत एकाच सप्तकांत कमी जावपाक शकता.
डिजिटल डिटॉक्स म्हणल्यार कितें?
तज्ञांच्या मतां प्रमाण, लोकांक जशें सोरो आनी सिगरेटीचें व्यासन लागता. तेच भशेन तांकां आभासी जगांत रावपाची संवय जाता. तांकां जाय जाल्यार लेगीत तातूंतल्यान भायर सरप शक्य जायना. असले परिस्थितींत तंत्रज्ञानाच्या विळख्यांतल्यान स्वताक पयस दवरपाक थोडो काळ डिजिटल सुटयेर वचप, हाका डिजिटल डिटोक्स म्हणटात. म्हणल्यार रेंज ना थंय वचप. संशोधकांनी ह्या अभ्यासांत 18 ते 72 वर्सां पिरायेच्या 154 लोकांचो आसपाव केलो. तांका दोन गटांनी वाटून घाले. पयल्या गटाचेर सोशल मिडीया बंदी घाली जाल्यार दुसऱ्या गटान सदचे भशेन सोशल मिडीयेचो वापर चालू दवरलो. वाटेंकार जाल्ल्यांनी सप्तकांतल्यान 8 वरां सोशल मीडिया अॅपाचेर सारलीं.
एक सप्तकभर संशोधन केले उपरांत, वाटेकारांच्यो तीन चांचण्यो घेतल्यो. हातूंत उदासीनता आनी चिंते कडेन संबंधित प्रश्नांचो आस्पाव आसलो. ह्या निकालांत कळ्ळें की, एका सप्तकाचो विसव घेतिल्ल्या गटाची भलायकी वॉरविक- एडिनबर्ग मेंटल वेलबींग स्केलार 46 वयल्यान 55.93 मेरेन वाडिल्ली. त्याच वेळार दुयेंती भलायकी प्रस्नमाची- 8 चेर तांची उदासीनताय पातळी 7.46 वयल्यान 4.84 मेरेन देंवली. ह्या प्रमाणे हुस्को 6.92 वयल्यान 5.94 मेरेन देंवलो. संशोधक जेफ लॅम्बर्ट म्हणतात, फकत एका सप्तकांत पयल्या गटांतल्या लोकांचो मूड सुदारलो आनी चिंतेची लक्षणा उणीं जाली. सोशल मिडिये पसून ल्हान ब्रेक पासून मानसीक भलायकेचेर सकारात्मक परिणाम करपाक शकता. डेली मेलाच्या अहवाला प्रमाण, यूकेंतल्या सोशल मिडिया वापरप्यांचो आंकडो 2011 वर्सा 45% आसलो तो 2021 वर्सा 71% मेरेन वाडला. 16 ते 44 वर्सां पिरायेचे 97 % लोक सोशल मीडिया अॅप्स वापरतात. वापरप्यांची सगळ्यांत सामान्य क्रिया म्हणल्यार अॅप्सांतल्या सामग्री वेल्यान ‘स्क्रोल’ करप. यू. एस आनी यूकेंत हाचे पयलीं असलेच तरेचे अभ्यास केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
