भांगरभूंय | प्रतिनिधी
-1,727 गोंयकारांक, 1,572 गोंया भायल्यांकः मुख्यमंत्री
पणजीः मोपांतल्या मनोहर आंतरराष्ट्रीय विमानतळाचेर आतां मेरेन 1,727 गोंयकारांक नोकऱ्यो मेळ्ळ्यात. जाल्यार राज्य सरकारान णव वर्सांत विमानतळाचेर सुमार 200.14 कोटी रुपया खर्च केल्यात. आमदार विरेश बोरकार आनी व्हेंझी व्हिएगश हांणी विधानसभेंत विचारिल्ल्या लेखी प्रस्नांक मुख्यमंत्री डॉ. प्रमोद सावंत हांणी दिल्ल्या जापेंतल्यान ही म्हायती मुखार आयल्या.
मनोहर आंतरराष्ट्रीय विमानतळाचेर आतां मेरेन 3,299 जाणांक नोकऱ्यो दिल्यात. तातूंतले 1,727 गोंयकार आसून उरिल्ले 1,572 गोंया भायले आसात. गोंयांतल्या 1,727 मदीं जाणांक कायमस्वरूपी, जाल्यार 486 जाणांक कंत्राटी पद्दतीचेर नोकऱ्यो दिल्यात, अशें मुख्यमंत्री डॉ. सावंत हांणी आमदार विरेश बोरकार हांणी विचारिल्ल्या प्रस्नाचे जापेंत नमूद केलां.
आमदार व्हेंझी व्हिएगश हांणी राज्य सरकारान आतां मेरेन मनोहर आंतरराष्ट्रीय विमानतळ आनी दाबोळी विमानतळाचेर कितलो खर्च केला, तातूंतल्यान सरकाराक कितलो महसूल मेळ्ळा, असो प्रस्न विचारिल्लो. ताचेर दाबोळी विमानतळ गोंय सरकारचे अखत्यारीत येना, तातूंतल्यान राज्य सरकाराक महसूल मेळपाचो प्रस्नूच येना, जाल्यार मोपा विमानतळा पसून राज्य सरकाराक 31 मे 2024 पसून महसूल मेळटलो, अशें मुख्यमंत्र्यांनी सांगलें.
दाबोळी विमानतळा खातीर राज्य सरकार खर्च करिना, पूण मोपा विमानतळा खातीर राज्य सरकारान फाटल्या 9 वर्सांत सुमार 200.14 कोटी रुपया खर्च केल्यात, अशेंय तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
