भांगरभूंय | प्रतिनिधी
मुख्यमंत्रीः दाबोळी विमानतळ सुरू दवरपा खातीर सरकाराचे यत्न
पणजी : मोपा आनी दाबोळी विमानतळाचेर विमानांची विभागणी करपा संबंदी फुडल्या सप्तकांत म्हत्वाची बसका जातली. विदेशीं विमानां मोपा विमानतळार देंवली जाल्यार देशीं विमानां दाबोळी विमानतळार देंवप शक्य आसा. दाबोळी विमानतळ बंद जावचो ना, विरोधकांनी दाबोळी विशीं घुस्पागोंदळ करचो न्हय, अशें आवाहन मुख्यमंत्री डॉ. प्रमोद सावंत हांणी केलें.
मुरगांव बंदराचेर संवसारीक क्रुज टर्मिनल प्रकल्पाचो बुन्यादी फातोर बसयलो. केंद्रीय बोट उद्देग मंत्री सर्बानंदा सोनोवाल हांचे हस्तुकीं बुन्यादी फातोर बसयलाे. ह्या वेळार मुख्यमंत्री डॉ. प्रमोद सावंत, केंद्रीय पर्यटन राज्य मंत्री श्रीपाद नायक, येरादारी मंत्री मॉवीन गुदिन्हो, भौशीक बांदकाम मंत्री निलेश काब्राल, पर्यटन मंत्री रोहन खंवटे, खासदार विनय तेंडुलकार, आमदार, कृष्णा साळकार, आमदार संकल्प आमोणकार आनी अधिकारी हाजीर आशिल्ले.
कार्यावळींत उलयतना मुख्यमंत्री डॉ. प्रमोद सावंत हांणी वयलें उलोवप केलें. मोपा विमानतळ आतां सुरू जातलो. मोपा विमानतळ सुरू जाले उपरांत दाबोळी विमानतळ बंद पडटलो अशो वावड्यो कांय जाण उठयतात. मोपा विमानतळ जाले उपरांत दाबोळी विमानतळ बंद पडचो ना, हाची जतनाय सरकार घेतलें. विमानांची योग्य प्रकारान विमागणी जावपाची गरज आसा. फुडल्या सप्तकांत हे विशीं बसका जातली. विदेशांतल्यान जीं विमानां येतात तीं मोपा विमानतळार देंवली. जाल्यार देशीं विमानां दाबोळी विमानतळार देंवपाक हरकत ना. विमानांचें योग्य नियोजन जावपाची गरज आसा अशें मुख्यमंत्री डॉ. प्रमोद सावंत हांणी सांगलें.
क्रुज टर्मिनलाचेर इमिग्रेशन कावंटर
मुरगांव बंदराचेर जावपी क्रुज टर्मिनलाचेर इमिग्रेशन कावंटर, म्हालवाहू यंत्रणा, वेपारी संकूल, रॅस्टोरंण्ट, पार्कींग ह्यो सुविधा आसतल्यो. 13.40 एकर जमनीचेर ह्यो सुविधा आसतल्यो. टर्मिनलाचेर 122.72 कोटींची गुंवतणूक जातली.
बायणा हांगा रेल्वे यार्डांत रॅम्प जातकूच राष्ट्रीय म्हामार्गा वेली येरादारी सुरळीत जातली. मुरगांव प्राधिकरणांतल्या पांच प्रकल्पांचेर 11.29 कोटी रुपया खर्च जातले. म्हाल येरादारीचो वेळ उणो जातलो.
कार्यावळींत मंगळुरू बंदरा वेल्या प्रकल्पांचें व्हर्च्युअल पद्दतीन उक्तावण जालें. हातूंत मल्या गेट, कोयर वेवस्थापन प्रकल्प, ट्रक टर्मिनल ह्या प्रकल्पांचो आस्पाव आसा.
आत्मनिर्भर भारताचे दिकेन पावल: सोनोवाल
प्रधानमंत्री नरेंद्र मोदी हांच्या फुडारपणा खाला देशाची आत्मनिर्भरतायेचे दिकेन नेटान वाटचाल सुरू आसा. येरादारी तशेंच अर्थीक उदरगती खातीर न्हंयांचो वापर योग्य तरेन जावपाक जाय. देशाच्या अमृत महोत्सवी काळांत देश उदरगतीचे तेंगशेर पावतलो अशें केंद्रीय मंत्री सर्बानंदा सोनोवाल हांणी सांगलें.
क्रुज टर्मिनल तशेंच हेर प्रकल्पांक लागून पर्यटन सुविधां मदीं वाड जातली, अशें केंद्रीय पर्यटन राज्यमंत्री श्रीपाद नायक हांणी सांगलें.
3 हजार लोकां खातीर रोजगार उपलब्ध
गोंयांत बंदर आसा, रेल्वे सेवा आसा. आतां मोपा विमानतळ जातलो. हाका लागून गोंयची वाटचाल लॉजिस्टीक हबाचे दिकेन सुरू आसा. प्रधानमंत्री गती शक्ती येवजणेक लागून गोंयांत 3 हजार लोकां खातीर रोजगार उपलब्ध जातलो. पर्यटन तशेंच येरादारीची उदरगत जातली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
