भांगरभूंय | प्रतिनिधी
गोंय, कर्नाटकांतल्या 9 बँकांक 75 लाखांक फटयलो
रिणांत बुडिल्ल्या भावाचें रीण फारीक करपाक उबारलें पावल
पर्वरी पुलिसां कडल्यान अटक
म्हापशें: आयपीएल बॅटिंगेंत रिणांत बुडिल्ल्या भावाचें रीण फारीक करपा खातीर व्हायट कॉलर ल्हान भाव जालो बँकांक तोपी घालपी गुन्यांवकार. दुबावीत दिलीप राजेगोवडा (32, धारवाड, कर्नाटक) ह्या ठगाक पर्वरी पुलिसांनी बंगळुरूंतल्यान अटक केली. मोटार रिणाच्या नांवा खाला दुबावीत बंटी बबलीन गोंय अनी कर्नाटकांतल्या वट्ट णव बँक फांट्यांक 75 लाख रुपयांक तोपी घाल्ल्याचें चवकशेंतल्यान उक्तें जालां. दुबावीत हो मॅकानिकल अभियंतो आसा.
ह्या प्रकरणाची काल (बिरेस्तारा) सांजवेळा पुलीस अधिक्षक निधीन वाल्सन हांणी पत्रकार परिशदेंत म्हायती दिली. ह्या वेळार पुलीस उपअधिक्षक विश्वेश कर्पे, निरिक्षक अनंत गांवकार आनी उपनिरिक्षक प्रतीक प्रभू भट हाजीर आशिल्ले.
फाटल्या जुलयांत पर्वरी पुलिशेंत पंजाब नॅशनल बँकेच्या पर्वरी फांटो वेवस्थापकान फटवणुकीची कागाळ नोंद केल्ली. एका अनवळख्या जोडप्यान बँकेत मोटार रिणा खातीर अर्ज केल्लो. ह्या अर्जा सयत एमएस कोस्टल होंडा पणजी हांचे कोटेशन जोडिल्लें. तशेंच शमंतक सुब्रोओ कडेकोडी आनी कविता मुनीबसवराज ह्या नांवां प्रमाण बनावट कागदपत्रां सादर केलीं. ते प्रमाण 8 लाखांची होंडा अमेझ (जीए 03 झेड 6591) ही मोटार खरेदी केली. तशेंच बनावट विम्याची प्रतूय सादर केल्ली.
उपरांत दुबावीत आरोपी मोटार रिणाचो हप्तो भरत नाशिल्ल्याचें पळोवन बँकेचे चवकशेंत सदर मोटार रिणा खातीर सादर केल्लीं कागदपत्रां ही कर्नाटकांतल्या मरण आयिल्ल्या जोडप्याचीं आशिल्ल्याचें दिसून आयिल्लें. उपरांत बँकेन पुलिशेंत धांव घेतिल्ली अशी म्हायती अधिक्षक वाल्सन हांणी दिली.
पुलीस चवकशे वेळार दुबावितांनी सदर मोटार बेळगांवांतल्या एका मनशाक मोटार 24 स्टोर वतीन विकिल्ल्याचें दिसून आयलें. दुबावीत आरोपीन अशेच तरेन कर्नाटकांतल्या कांय बँकांक तोपी घाल्ल्याचें दिसून आयलें.
बुधवारा 21 वेर पर्वरी पुलिसांनी कर्नाटक पुलिसांच्या आदारान बंगळुरूंत दुबावीत आरोपीक धरून भादंसंच्या 419, 468, 471 आनी 34 कलमा खाला गुन्यांव नोंद करून ताका अटक केल्या. म्हापशें न्यायालयान ताका चार दिसांची पुलीस कोठी दिल्या.
पुलीस अधिक्षक निधीन वाल्सन, उपअधिक्षक विश्वेश कर्पे हांच्या मार्गदर्शना खाला उपनिरिक्षक प्रतीक भट प्रभू, कॉन्सटेबल योगेश शिंदे, तुषार रावत आनी वांगडी पुलिसांनी ही कामगिरी केली.
दुबाविता सयत ह्या गुन्यांवांत प्रिती मंजुनाथ ही ताची घरकान्न वांटेकार आसा. तिचो सोद पुलीस घेतात. दुबावितांनी पांच बँकांच्या 9 फांट्यांक सुमार 75 लाखांची तोपी घाल्या. हातूंत गोंयच्या दोन बँकांतल्यान 16 लाखांचो आस्पाव आसा. गोंयांत पंजाब नॅशनल आनी इंडियन ओव्हरसीस ह्या बँकांचे फांटे जाल्यार कर्नाटकांत कर्नाटक ग्रामीण बँक, बँक ऑफ बरोडा, इंडियन ओव्हरसीस बँक, पंजाब नॅशनल बँक, भारतीय स्टेट बँक आनी कॅनरा बँकेचो आस्पाव आसा.
मोटार शोरुमांतल्यान कोटेशन घेवप. त्या कोटेशना प्रमाण बँकेन शोरूमाच्या बँक खात्यांत पयशे जमा केले उपरांत मोटार खरेदी करप आनी उपरांत सदर कोटेशना वयली शोरुमाच्या खात्यांत आपल्या बँक खात्याचो क्रमांक लावप. तें कोटेशन दुसरे बँकेंत सादर करप आनी शोरुमाच्या बदलांत आपल्या खात्यांत मोटार रिणाचे पयशे जमा करून घेवप अशी ही गुन्यांवाची तकली दुबावितान आपणायिल्ली.
दुबावीत आरोपी हो मॅकानिकल अभियंतो आसा. 2014 वर्सा म्हैसूर कॉलेजींतल्यान ताणें बिटेकाची पदवी घेतिल्ली. 2019 ते 2021 ह्या काळांत तो मॅक्सगुफा आनी स्टार हेल्थ इन्श्युरन्स ह्या दोन कंपनींत काम केलां. ह्या कंपनींतल्या विमोधारक मरण आयिल्ल्या मनशांचो डाटा मेळोवन तांच्या वैयक्तीक दस्तावेजां प्रमाण बनावट कागदपत्रां तयार करून आनी ती व्यक्ती आपूणच आशिल्ल्याचें भासोवन ही दुबावीत बंटी बबलीची जोडी बँकांक तोपी घालताली.
धारवाडचो दुबावीत दिलीप राजेगोवडा हाचो व्हडलो भाव आयपीएल बॅटिंगेंत पयशे लावन रिणांत बुडिल्लो. भावाचें हें रीण फारीक करपा खातीर दुबावितान ही लुबाडणुकीची तकली लडयली. विमो कंपनींत काम करीत आशिल्ल्याचो ताणें हे खातीर फायदो घेतलो. बँकांक लुटून ताणें तें रीण फारीक केलें आनी ह्या लुटीच्या गुन्यांवांतल्यान भायर पडपाचो ताणें निश्चेव केलो. ह्याच वेळार ताका मोटार अपघात जालो. सीट बेल्ट घालूंक नाशिल्ल्यान स्टेरिंगाचो धपको ताका बसलो आनी ताची एक किडणी निकामी जाली. किडणीच्या ऑपरेशनाच्या खर्चा खातीर ताका हो गुन्यांव मुखार सुरू दवरपाक भाग पडलें अशें पुलीस चवकशेंतल्यान उक्तें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
