भांगरभूंय | प्रतिनिधी
खबरां संस्था
नवी दिल्लीः उत्तर प्रदेशचे आदले मुख्यमंत्री आनी समाजवादी पार्टीचे (सपा) संस्थापक मुलायम सिंह यादव (82) हांकां गुरूग्रामांतल्या मेदांता हॉस्पिटलांत उपचारा मजगतीं मरण आयलें. फाटल्या कांय दिसां पसून तांचेर उपचार सुरू आशिल्ले.
मुलायम हांचो जल्म 29 नोव्हेंबर 1939त उत्तर प्रदेशांतल्या इटावांत जालो. तरणाटे पिरायेंतूच तांणी राजकारणांत सक्रीय वांटो घेतिल्लो. मुलायम सिंह यादव हांणी तीन खेपे उत्तर प्रदेशाचे मुख्यमंत्री पद भुशयलां. तशेंच 1996 ते 1998 मजगतीं ते केंद्र सरकारांत संरक्षणमंत्रीय आशिल्ले.
1992त मुलायम हांणी समाजवादी पक्षाची स्थापणूक केली. 5 डिसेंबर 1989त तांणी पयले खेपे राज्याच्या मुख्यमंत्रीपदाचो सोपूत घेतिल्लो. ते 24 जानेवारी 1991 मेरेन ह्या पदार कार्यरत आशिल्ले. ते उपरातं मायावती राज्याच्यो मुख्यमंत्री जाल्यो. 1992त समाजवादी पक्षाची स्थापणूक केले उपरांत वर्सभरांत म्हणल्यार 5 डिसेंबर 1993त ते दुसरे खेपे मुख्यमंत्री जाल्ले.
फुडल्या 11 वर्सांत सातत्यान संघर्श करीत तांणी तिसरे खेपे मुख्यमंत्रीपद मेळयलें. पूण चार वर्सा जाले उपरांत 11 मे 2007त तांणी मुख्यमंत्रीपदाचो राजिनामो दिल्लो.
प्रधानमंत्री मोदी हांणी उक्तायलें दुख्ख
पिरायेच्या 82व्या वर्सा निमणो श्वास घेवपी मुलायम सिंह यादव हांच्यो यादी ताज्यो करून दितना प्रधानमंत्री नरेंद्र मोदी हांणी दुख्ख उक्तायलां. मुलायम सिंह यादव हांणी उत्तर प्रदेशच्या आनी राष्ट्रीय राजकारणांत स्वताची वेगळी वळख निर्माण केल्ली. आणिबाणीच्या काळांत ते लोकशाये खातीर लडपी म्हत्वाच्या नेतृत्वां मदले एक आशिल्ले. संरक्षण मंत्री म्हूण तांणी सक्षम भारत घडोवपाचें काम केलां. तांणी लोकसभेंत उपस्थीत केल्ला मुद्दे अभ्यासपूर्ण, तशेंच राष्ट्रहिताचे नदरेन म्हत्वाचे आशिल्ले, अशें प्रधानमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
