भांगरभूंय | प्रतिनिधी
वरिश्ठ अधिकाऱ्यांक सतर्कतायेचे निदेश; जिल्होधिकाऱ्यांची ‘नागरी संरक्षक’ म्हूण नेमणूक
पणजी: भारत-पाकिस्ताना मदीं निर्माण जाल्ल्या झुजाचे परिस्थितीचे फाटभुंयेर मुख्यमंत्री डॉ. प्रमोद सावंत हांणी शुक्रारा मुखेल सचीव डॉ. व्ही कांडावेलू, पुलीस उपम्हानिरिक्षक अजय कृष्णन, वर्षा वर्मा हांचे सयत हेर पुलीस आनी सुरक्षा यंत्रणेच्या वरिश्ठ अधिकाऱ्यांची बसका घेवन राज्यांतल्या परिस्थितीचो नियाळ घेतलो. दुसरे वटेन सरकारान अशे परिस्थितींत ‘नागरी संरक्षक’ म्हूण दोनूय जिल्होधिकाऱ्यांची नेमणूक करून सरकारान तांचे खातीर नेमावळ जारी केल्या.
पहलगामांत पर्यटकांचेर जाल्ल्या आतंकवादी हल्ल्यांत पाकिस्तानांतल्या आतंकवाद्यांचो वांटो आशिल्ल्याचें उक्तें जाले उपरांत भारतान ‘ऑपरेशन सिंदूर’ हातांत घेवन, पाकिस्तानांतल्या आतंकवाद्यांच्या णव तळांचेर हल्ले केले. तातूंत खूबशा आतंकवाद्यांक मरण आयलें. उपरांत आतां भारतान पाकिस्ताना कडेन झुजाची तयारी सुरू केल्या आनी ते विशीं कांय दिसां पयलीं गोंया सयत विवीध राज्यांनी ‘मॉक ड्रील’ केलें. भारत-पाकिस्तान हांचे मदीं केन्नाय झूज जावपाची शक्यताय आशिल्ल्यान राज्य सरकारूय पुरायपणान सतर्क आसा. हेच फाटभुंयेर मुख्यमंत्री डॉ. प्रमोद सावंत हांणी शुक्रारा पुलीस आनी सगल्या सुरक्षा यंत्रणेच्या मुखेल अधिकाऱ्यां कडेन आल्तिनो हांगासरल्या सरकारी निवासस्थानार बसका घेतली आनी तांचे कडल्यान राज्यांतले सुरक्षा वेवस्थेचो नियाळ घेतलो. झुजाचे परिस्थितींत राज्यांतल्या सगल्या सुरक्षा यंत्रणांक चोवीस वरां सतर्क रावपाची सुचोवणी मुख्यमंत्र्यांनी बसकेंत हाजीर आशिल्ल्या सगल्या अधिकाऱ्यांक केल्या.
जिल्होधिकाऱ्यांची ‘नागरी नियंत्रक’ म्हूण नेमणूक
1. नागरिकांक भायर काडपा खातीर दिशानिदेश जारी करप, तांच्यो हालचाली तशेंच दिवे नियंत्रीत करप.
2. हवाई हल्ल्याची म्हायती दिवपा खातीर सायरन्स चालीक लावप.
3. नागरी संरक्षणा खातीर नेमिल्ल्या नागरी संरक्षण दळाक संघटीत करप, तांची नांवनोंदणी करप आनी तांकां प्रशिक्षण दिवप.
4. हवाई हल्लो तशेंच हेर आणिबाणिच्या वेळार सुरक्षीत वाठारांनी ब्लॅकआवट आनी प्रकाश निर्बंध लागू करप.
5. नागरी संरक्षण कर्मचाऱ्यांक प्रतिबंधीत वाठारांनी प्रवेश दिवपा खातीर परवाने, पास वा वळखपत्र जारी करप.
6. नागरी संरक्षण येवजण्यांच्या सुरळीत अंमलबजावणे खातीर थळावे पुलीस आनी आपत्ती वेवस्थापन प्राधिकरणां कडेन समन्वय सादप.
7. सामुदायीक सज्जताय वाडोवपा खातीर नागरी संरक्षण कवायती आनी जागरुकताय मोहिमो आयोजीत करप.
9. नागरी संरक्षण नदेशांक पाळो दिवंक नाशिल्ल्याच्या प्रकरणांनी नागरी संरक्षण कायदो, 1968 खाला दंड दिवप वा योग्य कारवाय करप.
नुस्तेमारां खातीर मागदर्शक तत्वां
– नुस्तेमारांनी राज्याच्या प्रादेशीक उदकांत (12 नॉटिकल मैला मेरेन) नुस्तेमारी करची.
– बोट धनयांनी दर्यांत वचपी दरेक बोटीच्या चालक दळांतल्या वांगड्यांची पुराय म्हायती संबंदीत वाठारांतल्या नुस्तें अधिकाऱ्यांक दिवची.
– नुस्तेमारांनी दर्यांत नुस्तेमारी खातीर वच्चे पयलीं नुस्तेमारी पास घेवचो आनी परतून आयिल्ल्याची म्हायती संबंदीत नुस्तें अधिकाऱ्यांक दिवची.
– ट्रेकिंग आनी सुरक्षीततायेच्या उद्देशान दर्यांत वतना ट्रान्सपॉन्डर चालू आशिल्ल्याची खात्री करची.
– नुस्तेमार जेटी वा ब्लॉक्साचेर कसल्याय दुबावीत हालचालींचेर लक्ष दवरचें.
– गरज आसता तेन्ना विभाग अधिकारी आनी हेर लायन विभाग अधिकाऱ्यांक सहकार्य करचें.
भारत-पाकिस्तान हांचे मदीं झुजाची परिस्थिती निर्माण जाल्ल्याचे फाटभुंयेर गोंयांतल्या भारतीय राखीव दळाच्या (IRB) पुलिसांच्यो सुटयो रद्द केल्यात. सद्या सुटयेर आशिल्ल्या सगल्यांनी ताकतिकेन कामार हजर रावपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
