भांगरभूंय | प्रतिनिधी
भाजपा प्रदेशाध्यक्ष सदानंद तानावडेः विरोधकांनीच वावडी पातळायिल्ल्याचो दावो
भांगरभूंय । प्रतिनिधी
पेडणें: मुख्यमंत्री डॉ. प्रमोद सावंत हांच्या फुडारपणा खाला सरकार स्थीर आसा. उदरगतीची गती लेगीत डबल इंजिना वरवीं चालू आसा. अशें स्थितींत मुख्यमंत्री बदलपाची शक्यताच ना. मुख्यमंत्री बदलतले ही फक्त एक वावडी. विरोधक एक एक करून वावड्यो पातळयतात, असो दावो भाजपा प्रदेशाध्यक्ष सदानंद तानावडे हांणी केलो.
पेडणेंचे नामनेचे पुनवे दिसा आयतारा देवदर्शन घेवन आयले उपरांत तानावडे थळाव्या पत्रकारां कडेन उलयताले.
पेडणेंचो नामनेचो पुनव उत्सव आयतारा व्हडा उमेदीन मनयलो. ह्या उत्सवाक गोंय, महाराष्ट्र, कर्नाटक वाठारांतल्यान हजारांनी भावीक सकाळ सावन श्री भगवती देवी, श्री रवळनाथ, देवाचो मांगर, रवळनाथ ह्या देवळांनी वचून देवदर्शन घेताले. मुख्यमंत्री डॉ. प्रमोद सावंत, पर्यटन मंत्री रोहन खंवटे, भाजपा प्रदेशाध्यक्ष सदानंद तानावडे, थळावे आमदार प्रवीण आर्लेकार, पेडणें भाजपा मंडळ अध्यक्ष तशेंच चांदेलचे सरपंच तुळशीदास गांवस, पेडणेंची नगराध्यक्ष माधव सिनाय देसाय, नगरसेविका उषा नागवेंकार, नगरसेविका तृप्ती सावळ देसाय आनी हेर पदाधिकाऱ्यांनीय देवदर्शन घेतलें.
पेडणें म्हालाचे उदरगती खातीर थळावे आमदार प्रवीण आर्लेकार हांकां वेळावेळार मुख्यमंत्री डॉ. सावंत हांचो आदार मेळटलो, अशें तानावडे हांणी सांगलें.
सध्या गोंयच्या राजकारणाक वेगळें मोडण मेळटा. भाजपांत काँग्रेसीचे आठ आमदार आयले उपरांत मुख्यमंत्री डॉ. सावंत हांचें कदेल बदलतलें काय कितें, असो प्रस्न पत्रकारांनी तानावडे हांकां विचारलो. ह्या प्रस्नाक जाप दितना तानावडे हांणी सांगलें, मुख्यमंत्री डॉ. सावंत हांच्या फुडारपणा खाला गोंयची गतीमान उदरगत चालू आसा. मुख्यमंत्री बदलपाचो प्रस्नूच येना. ते भायर जे आमदार काँग्रेसींतल्यान भाजपांत आयल्यात तांकां पक्षान कसलेंच आस्वासन दिवंक ना. वा एकाद्या मंत्र्याक काडून ते सुवातेचेर दुसऱ्याक मंत्री करपाची शक्यताय तानावडे हांणी भायर मारली.
फुडारांत पेडणें मतदारसंघाचे आमदार प्रवीण आर्लेकार हांकां मंत्रीमंडळांत घेतले व्हय, असो प्रस्न पत्रकारांनी तानावडे हांकां केलो. ताचेर जाप दितना तानावडे हांणी सांगलें, सध्या आमदार आर्लेकार हांचे कडेन हस्तकला म्हामंडळ सरकारान दिलां. ह्या म्हामंडळा वतीन ज्यो येवजण्यो आसात त्यो येवजण्यो मतदारसंघा वांगडाच गोंयांतल्या दरेका वाठारांत पावोवपाचें ते काम करतात. सध्याच्या मंत्रीमंडळाचो आंकडो वाडोवपाक मेळना. एकाद्या वेळार फुडारांत फुडले वेंचणुकेंत कसलोय बदल घडपाक शकता, अशें तानावडे हांणी सांगलें. पेडणें म्हालांत तीन मतदारसंघ हे वेंचणुकेंत तरी शक्य ना, अशें तानावडे हांणी एका प्रस्नाक जाप दितना सांगलें.
जीत आरोलकार हाका थेट प्रवेश मेळचो ना…
मांद्रेंचे आमदार जीत आरोलकार हांकां भाजपांत प्रवेश दितले व्हय, असो प्रस्न थळाव्या पत्रकारांनी भाजपा प्रदेशाध्यक्ष सदानंद तानावडे हांकां विचारलो. हाचेर जाप दितना तानावडे हांणी सांगलें, मगो पक्षाचे आमदार सुदिन ढवळीकार आनी मांद्रेंचे आमदार जीत आरोलकार हांणी भाजपा सरकाराक तेंको दिला. आरोलकार हांकां पक्षांत थेट प्रवेश दिवपाक मेळचो ना. तांकां जर भाजपांत येवपाचो आसा जाल्यार तांणी आमदारकेचो राजिनामो दिवनूच येवचो पडटलो. सध्या तरी तसो प्रस्ताव आपले मेरेन पावूंक ना, अशें सदानंद तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
