भांगरभूंय | प्रतिनिधी
इंडीयन प्रिमीयर लिगेचे (आयपीएल) 51वे मॅचींत आदलो वस्ताद मुंबय इंडियन्सान गुजरात टायटन्साक 5 धांवड्यांनी हारयलो. गुजरात टायटन्साक जैता खातीर 178 धांवड्यांची मोख मेळिल्ली. ताचो फाटलाव करतना ताका 5 विकेटी वगडावन 172 धांवड्यो करप शक्य जाल्यो.
एका वेळार गुजराताचो स्कोर 16 ओव्हरींनी 3 बाद 138 असो आशिल्लो. पंगड जैत जोडटलो अशें दिशिल्लें. पूण, मुंबय इंडियन्साच्या बॉलरांनी मॅच घुंवडायली.
मुंबय इंडियन्साचें हें फक्त दुसरें जैत आसा. जाल्यार गुजराताची तिसरी हार थारली.
ते आदीं गुजरात टायटन्सान टॉस जिखून मुंबय इंडियन्साक पयलीं बॅटींग करपाचें आमंत्रण दिलें. मुंबय इंडियन्सान जबरदस्त सुरवात केली. अंदूंच्या आयपीएलांतलो सगल्यांत म्हारगो खेळगडो थारिल्लो इशान किशना सयत मुखेली रोहीत शर्मान पावरप्लेंत 63 धांवड्यो केल्यो.
ही जोडी लेग स्पिनर राशिद खानान फोडली. ताणें रोहीत शर्माक (28) बाद करून मुंबयक पयलो धपको दिलो. ते उपरांत बॅटिंगेक आयिल्लो सुर्यकुमार यादव चड कितें करपाक शकलो ना आनी 11वे ओव्हरींत प्रदीप सांगवानाचो बळी थारलो. सुर्यकुमार 13 धांवड्यो करून राशिद खानाक कॅच दिवन तंबूंत परतलो.
ते उपरांत पंगडाक सांबाळचे आदींच अल्झारी जोसेफान इशान किशनाक (45) बाद करून केलो. 14 ओव्हरी उपरांत मुंबय इंडियन्सान 3 बाद 119 धांवड्यो केल्ल्यो. पंगडाक व्हड स्कोर उबारून दिवपाची जापसालदारकी टिळक वर्मा आनी किरोन पोलार्ड हांचेर आशिल्ली. पूण, राशिद खानान ही जोडी रोखडीच फोडली. राशिदान पोलार्डाक (4) बोल्ड केलो. ते उपरांत टिळक वर्मा आनी टीम डॅव्हिड हांणी जलद रितीन धांवड्यो केल्यो. अखेरेक हार्दिक पांड्यान टिळक वर्माक बाद करून ही भागिदारी फोडली. डॅनिएल सॅम्स लेगीत खातें उगडिनासतना ल्यॉकी फर्ग्युसनाचो बळी थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
