भांगरभूंय | प्रतिनिधी
वैमानीक वाटावलो, अपघाताचे चवकशेचे आदेश
भांगरभूंय I प्रतिनिधी
वास्कोः बुधवारा सकाळीं दर्यादेग वाठारांत नियमीत सराव उड्डाणा उपरांत दाबोळेच्या हंस नावीक तळा कडेन परत येतना मीग 29 के ह्या झुजारी विमानाच्या इंजिनांत अचकीत इबाड जाल्ल्यान विमान अरबी दर्यांत कोसळ्ळें. मात वैमानिकान दर्यांत उडी घेतिल्ल्यान तो वाटावलो. सोद आनी बचाव पंगडान रोखड्योच हालचाली करून ताका वाटायलो. ताची भलायकी स्थीर अासा.
खोल दर्यांत कोसळिल्ल्या मीग विमानाचो सोद सुरू आसा. भारतीय नौदळांत आस्पाव जाले उपरांत मीग 29 के विमानाक अपघात जावपाची ही चवथी घडणूक आसा. हे विमान अत्याधुनीक आनी रशिया बनावटीचें आसा.
बुधवारा सकाळीं नियमीत सरावा खातीर उड्डाण घेतिल्ल्या मीग 29-के विमानांतले एक विमान सरावा उपरांत परतून हंस नावीक तळार परतत आसतना विमानांत कांय तंत्रीक इबाड जाल्ल्याचे वैमानिकाच्या लक्षांत आयलें. ताणें हे विशीं संबंदीतांक म्हायती दिली. ताका लागून सोद आनी बचावा खातीर वेगान हालचाली जावन हॅलिकॉप्टर धाडले. दर्यांत उडी घेतिल्ल्या वैमानिकाचो सोद घेवन ताका वाटायलो.
भारतीय नौदळाच्या हंस तळा वयले मीग 29 के विमानां सकाळच्या वेळार नियमीत सराव करतात. तातूंत एक ट्रेनर, एक आसनी, दोन आसनी विमानांचोय आस्पाव आसता. ताका लागून सकाळच्या वेळार दाबोळी विमानतळाची धांवपट्टी नागरी उड्डाणा खातीर बंद दवरतात.
-3 जानेवारी 2018त पयलो अपघात. भारतीय नौदळाच्या हंस विमान तळाच्या धांवपट्टी वयल्यान उड्डाण घेतना मीग 29 के चे चाक घसरून जाल्लो अपघातांत विमानाक उजो लागिल्लो.
-8 जून 2019त सरावा खातीर उड्डाण केल्ल्या मीग 29 के विमानाची अतिरिक्त इंधन टांकयेक उजो लागून विमान धांवपट्टीचेर कोसळिल्लें.
-16 नोव्हेंबर 2019त भारतीय नौदळाच्या दाबोळीच्या हंस विमानतळा वयल्यान नियमीत सरावा खातीर उड्डाण केल्ल्या मीग 29 के ट्रेनर विमानाक सुकण्यांची धडक बसून इंजिनाक उजो लागून विमान वेर्णा पठाराचेर कोसळिल्लें.
-27 नोव्हेंबर 2020त भारतीय नौदळाचे मीग 29 के हे दोन आसनी ट्रेनर विमान अरबी दर्यांत कोसळून अपघात घडिल्लो. हातूंत वैमानिकाक मरण अायिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
