भांगरभूंय | प्रतिनिधी
भांगरभूंय प्रतिनिधी
मडगाव : भाजप सरकाराच्या प्रशासनांत मिशन 30 टक्के कमिशन तशेंच गैरकारभाराक लागून राष्ट्रीय खेळां सर्त परत एक फावट गोंयां भायर गुजरातं राज्यांत घेवची पडल्या असो आरोप काँग्रेस पक्षाचो कार्याध्यक्ष आनी कुंकळ्ळी मतदारसंघाचो आमदार युरी आलेमांव हांणी केला. गोंयांत ही सर्त घेवपाचें फाटल्या 14 वर्सां सावन चल्लां. इतल्या वर्सांत राज्यांत जाय आशिल्ल्या साधन-सुविधा अजून तयार जावंक नाशिल्ल्यान भारतीय ऑलिम्पीक असोसिएशनाक ही सर्त अदूं गुजरातांत घेवपी पडल्या अशें तांणी सांगलें.
राष्ट्रीय सर्ती खातीर सरकारान हातांत घेतिल्ल्या दरेक प्रकल्प बांदकामांत व्हडा प्रमाणात भ्रश्टाचार जालो आनी ताका लागून जाय त्या दर्जाचे हे प्रकल्प जावपाक शकले नात. खेळां सर्तीच्या नांवार स्टेडियमा आनी हेर खेळा प्रकल्पांच दुरुस्ती करपाच्या नांवान संबंदितांनी कोट्यांनी रुपयांचो भ्रश्टाचार केला असोय आरोप आलेमांव हांणी केला.
राष्ट्रीय खेळां खातीर पेडणे तशेंच नावेली हांगा उबारिल्ल्या प्रकल्पांत कामाचो दर्जो सकयल्ल्या पांवड्याचो आसा हें आतां सामकार येवपाक लागलां. पणजेचो स्विमींग पूल वेळार पुराय जावपाक शकलो ना. मडगांवचो स्विमींग पूल फाटल्या कांय वर्सां सावन बंद आसा. सरकारान खेळगड्यांक प्रशिक्षण दिवपा खातीर प्रशिक्षकांची नेमणूक केल्ली ना. कसलीच तयारी नाशिल्ल्यान खेळां सर्त गुजरातांत व्हरून ऑलिम्पीक असोसिएशनान गोंयच्या भाजपा सरकाराच्या तोंडार थापट मारलां अशें आलेमांव हांणी सांगलें.
आदल्या खेळा मंत्र्यांनी राष्ट्रीय खेळा सर्तीच्या खुस्तार आपली बोल्सां भरली अशें सांगून सर्ती खातीर साधन-सुविधा तयार करपा खातीर केल्ल्या खर्चाची चवकशी करून सत भायर हाडपाची मागणी आलेमांव हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
