माळ जिखपाक टीम इंडिया इत्सूक

भांगरभूंय | प्रतिनिधी

येजमान भारत आनी श्रीलंका ह्या पंगडां मदीं आयज माळेंतली दुसरी मॅच जातली. ही मॅच जिखून माळ जिखपाचो भारताचो यत्न आसतलो. पयली मॅच जिखपाक भारताक घाम गळोवचो पडिल्लो. ताका पयले मॅचींत निसट्टें दोन धांवड्यांनी जैत फावो जाल्लें.

भारताक आयची मॅच जिखपाक जाय जाल्यार ताका बरो खेळ करचो पडटलो. भारता खातीर ही माळ सोंपी आसची ना हें श्रीलंकेन पयले मॅचींत दाखोवन दिला.

अंदूं संवसारीक वन डे क्रिकेट सर्त जावपाची आसा, ताका लागून टी-20 फॉर्मेटाक सध्या व्हड म्हत्व ना. पूण, फुडल्या वर्सा जावपी संवसारीक टी-20 सर्तीचे दिश्टीन विचार केलो जाल्यार हे माळेक म्हत्व आसा. हे माळेंत युवा खेळगड्यांचेर खाशेली नदर आसतली. शुभमन गिल पावर प्लेंत कशें प्रदर्शन करता हाचेर सगल्यांची नदर आसतली. वेगान धांवड्यो करून ओपनराची सुवात घटमूट करपाक शकता.

भारता कडेन टी-20 फॉर्मेटांत खूब प्रतिभावंत खेळगडे आसात. ऋतुराज गायकवाड आनी राहुल त्रिपाठी सारके बॅट्समन संदीची वाट पळयतात. गील आनी इशान किशन तिनूय मॅचींनी खेळपाची संद मेळटली अशी आस्त आसा.

दीपक हुड्डा आनी अक्षर पटेल हांणी आपले बॅटिंगे वरवीं सगल्यांक प्रभावीत केल्यात. श्रीलंकेच्या बॉलरां आड कशे तरेन धांवड्यो करपाक जमतल्यो हाचेर भारताच्या बॅट्समनांक विचार करचो पडटलो. श्रीलंका वानिंदू हसारंगा आनी महीष तिक्षणा हांचेर चड निंबून आसा. मुंबय जाल्ले पयले मॅचींत दोगांयनी मेळून आठ ओव्हरींनी फकत 51 धांवड्यो दितना दोन विकेटी घेतिल्ल्यो.

भारताच्या बॉलरां विशीं सांगचें जाल्यार शिवम मावीचें पदार्पण उगडास उरपा सारकें जालें. ताच्या प्रदर्शनान मुखेली हार्दिक पांड्याक थाकाय मेळ्ळ्या आसतली. पांड्यान लेगीत नव्या बॉलान बॉलींग करतना प्रभावीत केलां. मावीची स्वींग आनी उमरान मलिक हाच्या वेगान बॉलिंग विभागांत विवीधताय आयल्या. फुडल्या वर्सा जावपी संवसारीक टी-20 क्रिकेट सर्तीचे दिश्टीन ह्या दोनूय बॉलरांक चड संद दिवपाक जाता. हुस्क्याचो विशय म्हणल्यार पोरूं ऑस्ट्रेलियेंत जाल्ले संवसारीक टी-20 सर्तींत खेळपाची संद मेळूंक नाशिल्ल्यान युजवेंद्र चहलाचो आत्मविस्वास हालला.

पयले मॅचींत ताणें फकत दोन ओव्हरींनी 26 धांवड्यो दिल्ल्यो. मुखेल्यान ताका आपल्या कोट्यांतल्यो ओव्हरी लेगीत पुर्ण करपाक दिवंक ना.