भांगरभूंय | प्रतिनिधी
पेडणें: बुधवारा रातीं मालपें-पेडण्यां राष्ट्रीय म्हामार्गार बुधरावा रातीं महाराष्ट्रांतल्यान गोंयांत गोड घेवन येवपी ट्रक रस्त्याचो अदमास येवंक नाशिल्ल्यान लवंडून ड्रायव्हर आडकून उरलो. पेडणें उजो पालोवपी दळाक म्हायती मेळटकूच पेडणें उजो पालोवपी दळाचे जवान घडणूक थळार वचून अपघातांत सांपडिल्ल्या ट्रकाच्या कॅबिनांतल्यान ड्रायव्हराक भायर काडून ताका वाटायलो.
मेळिल्ले म्हायती प्रमाण महाराष्ट्रांतल्यान गोड घेवन येवपी एमएच 03 सीपी 4118 ट्रक पेडणें मार्गान म्हापश्यां येतालो. रातच्या वेळार मालपें देंवतेर पावलो तेन्ना ड्रायव्हराक रस्त्याचो अदमास येवंक नाशिल्ल्यान व्हॉल्तार ट्रक लवंडलो. ह्या अपघातांत ड्रायव्हर गणेश जस्वाल रावपी मुंबय हो कॅबिनांत आडकून उरलो. भितर आडकल्ल्या जस्वालाक पावर लिफ्टीचो वापर करून ताका क्रॅनीच्या आदारान भायर काडलो.
हातूंत उजो पालोवपी दळाचे सहाय्यक अधिकारी सुनील देसाय, विठ्ठल परब, पी. गवंडी, राजेश परब, सहदेव परब, श्याम आरोंदेकार, शेखर मयेंकार आनी पालिकेच्या कर्मचाऱ्यांनी खर कश्ट घेतले.
अपघात जाल्ल्या ट्रकांत आठ टन गोडाच्यो ढेपी तशेंच कवचेच्येा रित्यो बाटल्यो व्हड प्रमाणांत आशिल्ल्यो. हें गोड एका खाजगी कंपनींत व्हरताले अशी म्हायती मेळ्ळ्या.
अपघातांत जखमी जाल्ल्या ड्रायव्हराक म्हापशेंच्या आझिलो हॉस्पिटलांत दाखल केला. थंय ताचेर उपचार सुरू आसात. पेडणें पुलिसांनी पंचनामो करून फुडलो तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
