माडेलांत जेसीबी चोरलो; तिगांक अटक

भांगरभूंय | प्रतिनिधी

पणजी: माडेल हावसिंग बोर्ड वाठारांत उक्ते सुवातेर पार्क करून दवरिल्लो जेसीबी चोरी केल्ल्या प्रकरणांत कोलवाळ पुलिसांनी कर्नाटकांतल्या रवी धिरप्पा चव्हाण (माडेल), रवी धाकप्पा राठोड (माडेल) आनी प्रकाश राठोड (थिवी) ह्या तिगांक अटक केल्या. अटक केल्ल्या दुबावितां कडल्यान निखळून दवरिल्लो जेसीबी जप्त केला.

कोलवाळ पुलिसांनी दिल्ले म्हायती प्रमाण ह्या प्रकरणांत आराडी, सुकूर हांगाचो यमनूर कडकल हाणें कागाळ दाखल केल्ली. ते प्रमाण कागाळदाराचो जेसीबी 28 मार्च दिसा सांजवेळा 6.45 वरांचेर माडेल हावसिंग बोर्ड वाठारांतले उक्ते सुवातेंत पार्क करून दवरिल्लो. उपरांत कडकल 29 मार्च दिसा सकाळीं 9.30 वरांचेर जेसीबी व्हरपाय आयलो, जाल्यार थंयच्यान जेसीबी गायब जाल्ल्याची म्हायती कागाळेंत नमूद केली.

हाची दखल घेवन उत्तर गोंय पुलीस अधिक्षक निधीन वाल्सन आनी उपअधिक्षक जिवबा दळवी हांच्या मार्गदर्शना खाला पुलीस निरिक्षक सोमनाथ माजीक हांच्या फुडारपणा खाला कुणाल नायक हांणी अनवळखी मनशां आड भारतीय दंड संहितेच्या कलम 379 खाला गुन्यांव दाखल करून तपास सुरू केलो. उपरांत वरिश्ठ अधिकाऱ्याच्या मार्गदर्शना खाला पुलीस निरिक्षक सोमनाथ माजीक हांच्या फुडारपणा खाला कुणाल नायक, पुलीस हवालदार पांडुरंग नायक, कॉन्स्टेबल सुलेश नायक आनी हेर पुलिसांचो विशेश पंगड तयार करून जेसीबी चोरी प्रकरणांत तपास सुरू केलो. ह्या वेळार पंगडान आशिकुशीची सीसीटीव्हीची तपासणी सुरू केली. तशेंच वाठारांत जेसीबी वेवसाया कडेन संबंदीत आशिल्ल्या कावलां अड्ड्यांची म्हायती घेवन चवकशी सुरू केली.

मजगतीं, पंगडाक एका दुबाविताची म्हायती मुखार आयली. ते प्रमाण पंगडान ताका ताब्यांत घेवन ताची चवकशी करतकूच हेर दुबावितांची म्हायती मुखार आयली. तशेंच दुबावितांनी जेसीबी चावी लायनासतना सुरू करून दुसरे सुवातेर व्हरून तो निखळिल्ल्याची म्हायती मुखार आयली.

पंगडान रवी धिरप्पा चव्हाण, रवी धाकप्पा राठोड आनी प्रकाश राठोड ह्या तिगां दुबावितांक ताब्यांत घेवन रितसर अटक केली. तशेंच निखळून दवरिल्लो जेसीबी जप्त केलो.

पुलिसांनी अटक केल्ल्या तिगां दुबावितांक पुलीस कोठी खातीर आयतारा म्हापशेंच्या पयलो वर्ग न्यायालयांत हजर करतकूच न्यायालयान तिगांय दुबावितांक तीन दीस पुलीस कोठी दिल्या.