मांद्रेंच्या शेतकारांक मजत करतलों

भांगरभूंय | प्रतिनिधी

आमदार आरोलकार: पेडण्यां भात कापणी, मळणी यंत्रांच्या कामाचो शुभारंभ

पेडणें: शेताक प्रोत्साहन दिवपाक मांद्रें मतदारसंघांतल्या सगळ्या शेतकारांक भात मळणी, भात कापणी वा शेत नांगरपा खातीर फुकट सवलती दितले, अशें मांद्रें मतदारसंघाचे आमदार जीत आरोलकार हांणी सावंतवाडो मांद्रें हांगा सांगलें. ते पेडणें म्हाल शेतकरी सेवा सहकारी कृशी विभाग हांच्या जोड पालवान भात कापणी, मळणी यंत्राच्या कामाचो शुभारंभ कार्यावळीक उलयताले.

ह्या वेळार मांद्रें सरपंच अमित सावंत, कृशी अधिकारी धीरज परब, पेडणें म्हाल शेतकरी सेवा सहकारी संस्थेचे अध्यक्ष संतोष मळीक, संचालक गजानन शेट कोरगांवकार, संचालक शांबा सावंत, संचालक सुहास नायक आनी हेर हजर आशिल्ले. 

ह्या वेळार आमदार आरोलकार हांणी, नव्या युवा शेतकारांक हायस्कूल, उच्च माध्यमीक विद्यालयांनी शिक्षण घेतना विद्यार्थ्यांक एक तरी विशय शेतकीचो आसप गरजेचें. शेताचें शिक्षण शालेय पांवड्यावेल्यान विद्यार्थ्यांक जर मेळत जाल्यार तांकां शेताची आवड निर्माण जातली. शेती वेवसायाकडेन युवा पिळगीय व्हडा संख्येन वळटली असो विश्वास आमदार जीत आरोलकार हांणी उक्तायलो. 

शेता खातीर ज्या शेतकारांनी मळणी, कापणी आनी हेर शेतांची लागवड केल्या आनी तांकां जो खर्च आयला तीं सगळीं बिलां आपल्या कार्यालयांत आयल्या उपरांत आमी शेतकारांक ताचो लाव मेळोवन दितले अशें आमदार आरोलकार हांणी जाहीर करून वेंचणुके पयलीं दिल्लें आस्वासन 100% पाळटले अशें सांगलें. 

भात, शेत मळणी, कापणी करपा खातीर यंत्रांचो शुभारंभ करतना एका वरा खातीर वट्ट चोवदाशें रुपया खर्च येता. तांतले सातशें रुपया शेतकारांनी जाल्यार सातशें रुपया सरकारान अनुदान दिवचें आसता. हे विशीं सावंतवाडो मांद्रें हांगचे थळावे पंच तशेंच सरपंच अमित सावंत हांणी ह्या शेतकारांचे 50 टक्के पयशे आपूण भरतलों. जें सरकारा कडल्यान 50 टक्के अनुदान मेळटलें तांतल्यान शेतकारांक कसलेच तरेचो खर्च येवचो ना अशें अमित सावंत हांणी सांगलें. 

संचालक गजानन शेट कोरगांवकार हांणी सुत्रसंचालन आनी सगळ्यांक येवकार दिलो. संस्थेचे चेअरमन संतोष मळीक हांणी प्रास्तावीक केलें आनी संचालक सुहास नायक हांणी उपकार मानले.