भांगरभूंय | प्रतिनिधी
मडगांव: मडगांव नगराध्यक्षपदा खातीर 12 ऑक्टोबराक सकाळीं 11 वरांचेर वेंचणूक जातली. मडगांवचे आमदार दिगंबर कामत हांणी भाजपांत प्रवेश केल्ल्यान भाजपा कडेन 15 जाल्यार गोवा फाॅरवर्ड पक्षा कडेन 9 उमेदवार आसात. जाल्यार एक अपक्ष उमेदवार आसा. भाजपा कडेन भोवमताचो आंकडो आसलो तरी अजून मेरेन नगराध्यक्षपदाचो उमेदवार थारना.
हाचे पयलीं नगराध्यक्षपदा खातीर गुप्त मतदान जाल्लें. हातूंत घनश्याम शिरोडकार हांकां 15 मतां पडिल्लीं, जाल्यार दामोदर शिरोडकार हांकां 10 मतां पडिल्ली.
राज्य सरकारन पालिका कायदो (दुरुस्ती) अध्यादेश जारी केला. ते प्रमाण आतां मतदान गुप्त न्हय जाल्यार हात वयर करून जातलें. चडांत चड हात ज्या उमेदवारा वटेन वयर जातले, ताची नगराध्यक्ष म्हूण निवड जातली. वेंचणूक अधिकारी म्हूण विकास गावणेकार हाजीर आसतले. सकाळीं 11 वरांचेर मतदान जातलें. मात, नगराध्यक्षपदाचो उमेदवार कामत गटाचोच आसतलो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.