भांगरभूंय | प्रतिनिधी
भांगरभूंय । प्रतिनिधी
पणजीः गोंयांत अजून मंकीपोस्काचे दुयेतीं सापडले नात. मात ताचो राज्यांत संसर्ग जावचो न्हय हे खातीर सगल्यां पांवड्यार फावो ती जतनाय घेवपाचें काम चल्लां. दाबोळी विमानतळ आनी मुरगांव बंदरांत खासा स्क्रिनिंगाची वेवस्था केल्ल्या. आयडीएसपी कार्यावळ (इंटेग्रेटेड डिसीज सर्वेलन्स प्रोग्राम) सुरू केल्या. मंकीपोस्काचो संसर्ग जाल्ल्या देशांतल्या राज्यांत येवपी पर्यटकांचेर नदर दवोरतले अशें राज्याच्या संसर्गजन्य आनी राज्य सर्वेलन्स अधिकारी डॉ प्रशांत सूर्यवंशी हांणी ही म्हायती दिली.
मंकीपोस्काच्या दुयेंतींचेर उपचार करपा खातीर जिल्हो हॉस्पिटलां, उपजिल्हो हॉस्पिटलां, सामाजीक भलायकी केंद्रा, चिखली आनी कासावली भलायकी केंद्रांत दरेकी दोन खाटो राखीव दवोरपाची सूचोवणी केल्या. केरळ (3) आनी दिल्लींत एक मेळून मंकीपोस्काचे वट्ट 4 दुयेंती देशांत आतां मेरेन मेळ्ळ्यात अशें सूर्यवंशी हांणी मंगळाराक सांगलें. गोंयांत मंकीपोस्काचो संसर्ग आडावपाक आनी ताका तोंड दिवपा आमी सगली तयारी केल्या अशें तांणी स्पश्ट केलां.
गोंयांत अजून मंकीपोस्क पावलो ना. हें दुयेंत तितलें घातमारें न्हय. लोकांनी हुस्को करपाची गरज ना. विमानतळ आनी मुरगांव बंदर अथिकाऱ्यां खातीर केंद्र तशेंच राज्य सरकारान मार्गदर्शक तत्वां जारी केल्यांत. मंकीपोस्काची लक्षणां आशिल्लो पर्यटक मेळ्ळ्यार ताची तपासणी करून उपचार केंद्रांत ताका धाडटले अशें डॉ सूर्यवंशी हांणी सांगलें. गळ्यांतलो स्वॅब, सीरम नमूनो तशेंच आंगावयल्यो पुळयो हाचे वयल्यान मॅकीपोस्काचें निदान करतात अशी म्हायती तांणी दिली.
मंकीपोक्सा विशीं तपशील दितना डॉ सूर्यवंशी हांणी सांगलें की हें माकडाच्या विशाणून जावपी एक व्हायरल दुयेंस आसा लिंगीक मार्गांतल्यान तें पातळटा, संसर्ग जाल्ल्या मनशा कडेन चड तेंप संपर्कांत रावल्यार तें जाता. कोरोना जावचो न्हय म्हणून जी जतनाय घेतात ती लोकांनी घेवल्यार दुयेंसाचो संसर्ग जायना. प्रवास करपी लोकांक हें दुयेंस जातां हें अजून स्पश्ट जाल्लें ना अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
