भांगरभूंय | प्रतिनिधी
लांच घेवपी ड्राफ्टसमनाक केलो निलंबीत
भांगरभूंय I प्रतिनिधी
पणजी : नगर नियोजन खात्यांतल्या भ्रश्टाचारा आड नगरनियोजन मंत्री विश्वजीत राणे हांणी थेट कारवाय सुरू केल्या. लांच घेवपी एका डॉफ्टसमनाचेर तांणी निलंबनाची कारवाय केल्या. चवकशेंत सदर ड्रॉफ्टसमन दोशी थारलो जाल्यार ताका सेवेंतल्यान बडतर्फ करतलें, अशेंय तांणी सांगलें.
सरकारी खात्यांतल्या भ्रश्टाचाराची चर्चा आयकुपाक येता. बरेच कर्मचारी कामां करपाक लोकां कडल्यान लांच घेतात. नगरनियोजन खात्यांत लेगीत भ्रश्टाचार आशिल्ल्याचे आरोप बरेच खेपे जाल्या. नगरनियोजन खात्याचे मंत्री विश्वजीत राणे हांणी बरेच खर निर्णय घेतल्यात. नगरनियोजन खात्याचो कारभार सुरळीत करपा खातीर तांणी आतां खर पावलां उबारपाचो निर्णय घेतला.
तिसवाडीतलो ग्रेड वन ड्रॉफ्टसमन चंद्रशेखर तुयेंकार हाचे आड बऱ्योच कागाळी आशिल्ल्यो. प्रमाणपत्रां दिवपा खातीर तो पयशें घेतालो, अशो कागाळी वरिश्ठा मेरेन पाविल्ल्यो. मुळावी चवकशी करून ताका सेवेंतल्यान निलंबीत केला. मुखेल नगरनियोजक जेम्स मॅथ्यू हे ताची चवकशी करतले. चवकशेंत तो दोशी थारलो जाल्यार ताका सेवेंतल्यान बडतर्फ करतले, अशें तांणी स्पश्ट केला. नगरनियोजन खात्याचो कारभार सुरळीत करपाक मंत्री राणे हांणी खर निर्णय घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
