भांगरभूंय | प्रतिनिधी
विद्यार्थ्यांक, पालकांक जतनाय घेवपाचे निर्देश
पणजी : शालेय विद्यार्थ्यांचे अपहरण करपा विशीं सुरू आशिल्ल्या चर्चांचे फाटभुंयेर, राज्यांतल्यो शिक्षणीक संस्था सादूर जाल्यात. कांय शाळांनी शेनवारा विद्यार्थ्यांच्या पालकांची बसका घेवन तांकां आपल्या भुरग्यांची जतनाय घेवपाची सुचोवणी केल्या. जाल्यार जतनायेचो उपाय म्हूण पुलीस खात्यान कांय शाळां भायर पुलीस बंदोबस्त दवरला.
शालेय भुरग्यांचें अपहरण करपी टोळी राज्यांत वावुरता अशो चर्चा फाटल्या कांय दिसां पसून सुरू आसात. पुलीस म्हासंचालक डॉ. जसपाल सिंग हांणी ह्याे वावड्यो आशिल्ल्याचे पत्रकार परिशद घेवन स्पश्ट केलां. पूण ह्या वावड्यांचो सगल्यांत व्हड फटको रस्त्यां वयल्यान भोंवपी मनोरुग्ण दुयेंतींक बसता. फाटल्या कांय दिसांनी भुरग्यांच्या अपहरणा निमतान शाळा तशेंच हेर वाठारांनी भोंवपी अशा मनोरुग्णांक मारपेट जाल्ल्याचो घडणुको घडल्यात. हातूंतल्यान कायदो आनी सुवेवस्थेचो प्रस्न निर्माण जाला.
मजगतीं, अपहरणाच्या वाडट्या चर्चांक लागून भोवतेक शाळांतल्या शिक्षकां मदीं भिरांत निर्माण जाल्या. ताका लागूनच शिक्षकांनी शेनवारा शाळा भरले उपरांत विद्यार्थ्यांक फक्त आपल्या पालकां वांगडाच घरा वचपाच्यो, तशेंच अनवळखी व्यक्तींनी आपयल्यार बेगोबेग ताची म्हायती वर्ग शिक्षकांक दिवपाची सुचोवणी केल्या. ते उपरांत पालकां कडेन बसका घेवन आपल्या भुरग्यांक शाळा सुटपाचे वेळेंत हजर रावन घरां व्हरपाचे निर्देश दिल्यात.
शाळा सुटपाच्या वेळार एकाच सुवातेर जायते विद्यार्थी उबे आसतात. दरेक विद्यार्थ्यांचेर लक्ष दवरप शिक्षकांक शक्य नासता. ताका लागून पालकांनी शिक्षकांक सहकार्य करचें, अशें आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
