भारत 9 धांवड्यांनी हारलो

भांगरभूंय | प्रतिनिधी

संजू सॅमसन आनी श्रेयस अय्यर हांच्या अर्द शेंकड्याचे खेळी उपरांत लेगीत भारताक पयले वन डे मॅचींत दक्षीण आफ्रिके आड 9 धांवड्यांनी हार घेवची पडली.

संजून शार्दुल ठाकूरा वांगडा 93 धांवड्यांची भागिदारी करून अखेर मेरेन लडलो.

ते पयलीं डॅव्हीड मिलर आनी हॅन्रीच क्लासेन हांकां दिल्लीं जीवनदानां भारताक म्हारग पडलीं. दोगांयनी मेळिल्ल्या जीवनदानांचो फायदो घेत 139 धांवड्यांची भागिदारी करून आफ्रिकेचो स्कोर 4 बाद 249 मेरेन पावयलो.

भारताक अपेक्षीत सुरवात करपाक जमली ना आनी आफ्रिकेच्या स्पिनरांनी भारताक धांवड्यो करपाक दिल्यो ना.

भारताक बरी सुरवात करपाक जमली ना. शुभमन गील (3) आनी मुखेली शिखर धवन (4) हे रोखडेच बाद जाले. पदार्पण करपी ऋतुराज गायकवाड आनी ईशान किशन हांणी 69 बॉलांनी 40 धांवड्यांची भागिदारी केली. पूण, तब्रेज शम्सीक मुखार येवन शॉर्ट मारपाची आस्त म्हारग पडली. तो 19 धांवड्यो करून स्टंप बाद जालो.

खेळपट्टी स्पिनरांक मजत करताली, हाचो फायदो घेत शम्सीन आनी केशव महाराजान भारताच्या बॅट्समनांचेर अंकूश दवरपाक येस मेळयलें. महाराजान 18वे ओव्हरींत इशानाक (20) बाद करून भारताक चवथो धपको दिलो.

श्रेयस आनी संजू हांची 67 धांवड्यांची भागिदारी लुंगी एनगिडीन सोंपयली. श्रेयसान 37 बॉलांनी 8 चवक्यांचे मजतीन 50 धांवड्यो केल्यो. श्रेयस बाद जाल्या उपरांत संजून सगलीं सुत्रां आपल्या हातांत घेतली. ताणें शार्दुल ठाकुरा वांगडा मेळून डाव मुखार व्हेलो. पूण, भारताक जैता खातीर 12.30चे सरासरीन धांवड्यो करपाची गरज आशिल्ली. संजू-ठाकूर हे जोडयेक ह्या वेगाचो फाटलाव करपाक कठीण जातालें. 30 बॉलांनी भारताक 73 धांवड्यांची गरज आशिल्ली. संजून 49 बॉलांनी वन डे क्रिकेटींतलो आपलो दुसरो अर्द शेंकडो पुर्ण केलो. शार्दुलान 37वे ओव्हरींत रबाडाचे ओव्हरींत तीन चवके मारले.

अखेरेक एनगिडीन 38वे ओव्हरींत शार्दुलाक (33) बाद करून 93 धांवड्यांची भागिदारी फोडली. फुडल्या बॉलाचेर ताणें कुलदीप यादवाक बाद केलो. भारताक 12 बॉलांनी 37 धांवड्यांची गरज आशिल्ली. पूण, अखेरेक भारताक 9 धांवड्यो उण्यो पडल्यो.