भांगरभूंय | प्रतिनिधी
टीम इंडिया नव्या वर्सांतली मोहिमेक सुरवात करपाक सज्ज आसा. आयच्यान भारताचो पंगड श्रीलंके आड तीन मॅचींची टी-20 आनी तीन मॅचींची वन डे माळ खेळटलो. आयज पयली टी-20 मॅच जातली. भारताचो सदचो मुखेली रोहित शर्मा टी-20 माळेंत खेळचो ना, ताका लागून ताचे सुवातेर हार्दिक पांड्या फुडारपण करतना दिसतलो.
मिशन 2024 खातीर पंगड तयार करपाची जापसालदारकी ताचेर आसतली. फुडल्या वर्सा वॅस्ट इंडीज आनी अमेरिकेंत संवसारीक टी-20 सर्त जावपाची आसा. हे सर्तींत हार्दिक पांड्या पंगडाचें फुडारपण करतलो अशी शक्यताय आसा.
रोहित शर्मा, विराट कोहली आनी लोकेश राहुल हे माळेंत खेळटना दिसचे नात, ताका लागून हार्दिक पांड्याचो ठसो पुर्णपणान दिसतलो. अंदूं जावपी संवसारीक वन डे क्रिकेट सर्त भारतातूंच जातली. भारतीय क्रिकेट नियामक मंडळ (बीसीसीआय) आनी पंगड वेवस्थापनाचें लक्ष ते सर्तीचेर आसतलें. ते खातीर वेवस्थापनान 1 जानेवारीक बसका घेवन रोडमॅप लेगीत तयार केला.
हालींच जाल्ले संवसारीक टी-20 क्रिकेट सर्तींत भारताक आक्रमक खेळ करपाक जमूंक नाशिल्लो. ताका लागून ताचेर सगले वटेच्यान टिका जाल्ली. टिकाकारांक खर जाप दिवपाक पंगड इत्सूक आसतलो.
मोटार अपघाता उपरांत विकेटकीपर बॅट्समन ऋषभ पंत बरोच काळ पंगडांतल्यान भायर उरतलो. टी-20 माळे खातीर ताची निवड जावंक नासली तरी फुडारांतल्या म्हत्वाच्या टी-20 मॅचींनी ताची निवड जातली आशिल्ली. पूण, आतां ताचे गैरहाजेरेंत विकेटकिपींगे खातीर ईशान किशन आनी संजू सॅमसन हांचेर निवड समितीचो दोळो आसतलो. ईशान किशन डावाची सुरवात करपाक शकता.
किशन आनी ऋतुराज गायकवाड हे डावाची सुरवात करपाक शकतात. पूण, ह्या दोगां खेरीत पंगडा कडेन शुभमन गिलाच्या रुपान आनीक एक ओपनराचो पर्याय आसा. तिसरे सुवातेर सुर्यकुमार यादव खेळटना दिसतलो.
निवड समितीन शिवम मावी, मुकेश कुमार आनी राहुल त्रिपाठी ह्या नव्या चेऱ्यांचो आस्पाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
