भांगरभूंय | प्रतिनिधी
खबरां संस्था
वेलिंग्टनः पोरूं भारत- न्युझिलंड क्रिकेट टॅस्ट मॅचींत न्युझिलंडाचो स्पीनर एजाज पटेलान एका डावांत भारताच्या 10 बॅट्समनांक आवट केल्लें. भारताचो आदलो बॉलर अनिल कुंबळे आनी इंग्लंडाचो आदलो क्रिकेटीयर जीम लॅकर ह्या दोन दिग्गजां उपरांत अशी कामगिरी करपी तो तिसरो बॉलर थारिल्लो. एजाज पटेलान जी जर्सी घालून हो विक्रम केल्लो ती आतां पावणेर काडल्या.
भारताच्या सगल्या बॅट्समनांक आवट केल्ल्यान सगल्या भारतीय खेळगड्यांनी पटेलाचे जर्सीचेर सयो केल्ल्यो. ही जर्सी पावणे वरवीं विकून एजाज पटेल व्हडली रक्कम एकठांय करतलो. तशेंच मेळिल्ली रक्कम तो स्टारशीप ह्या ल्हान भुरग्यांच्या हॉस्पिटलाक दान करतलो. जर्सी खातीर बोली सुरू जाल्यात आनी 11 मे मेरेन उक्ती पावणी जातली.
एजाज पटेलान पावणेविशीं सोशल मीडियार एक पोस्ट बरयल्या. तातूंत ताणे “आयचो दीस म्हजे खातीर खाशेलो आसा. ल्हान भुरगीं आनी तांच्या घरच्यांक मजत करपा परस खंयचेंय काम व्हड ना. हे पावणेंतल्यान चडात चड पयशे मेळटले अशी म्हजी अपेक्षा आसा. हे जर्सीचेर सगल्या भारतीय खेळगड्यांचो सयो आसात” अशें तांणे म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
