भांगरभूंय | प्रतिनिधी
येजमान भारतान दुसरे वन डे मॅचींत श्रीलंकेक 4 विकेटींनी हारोवन तीन मॅचींचे माळेंत 2-0 अशी निर्णायक आघाडी घेतली.
श्रीलंकेन टॉस जिखून इडन गार्डन्स मैदानाचेर पयलीं बॅटींग करपाचो निर्णय घेतलो आनी फकत 215 धांवड्यो केल्यो. ताचो डाव 40 ओव्हरींनी सोंपलो. मोखीचो फाटलाव करपी भारतान शंबर धांवड्यां भितर म्हत्वाच्यो चार विकेटी वगडायल्यो. भारताचेर हारीचें सांवट पातळिल्लें. पूण, लोकेश राहुलान एक बाजू सांबाळून धरली. ताणें नाबाद अर्द शेंकड्याची खेळी करून भारताक जैत मेळोवन दिलें.
ते पयलीं पदार्पणाची मॅच खेळपी नुवानिदु फर्नांडो (50) आनी कुशल मॅण्डीस (34) हांच्या नेटार श्रीलंकेन एका वेळार 1 बाद 102 धांवड्यो केल्ल्यो. तो बरे स्थितीत दिसतालो. पूण, चायनामॅन कुलदीप यादव आनी मोहम्मद सिराज हांणी श्रीलंकेची मदली फळी गडगडावन उडयली. भुजाचे दुखापतीक लागून पंगडांतल्यान भायर आशिल्ल्या युजवेंद्र चहलाचे सुवातेर खेळपी कुलदीप यादवान मेळिल्ले संदीचो फायदो घेतलो. ताणें आनी सिराज हांणी दरेकी तीन विकेटी घेतल्यो.
श्रीलंकेन 43 बॉलां भितर पांच विकेटी वगडायल्यो. फाटीचे दुखापतीक लागून फॉर्मांत आशिल्लो पथुम निसंका खेळूंक ना. ताचे गैरहाजेरेंत नुवानिदुक पदार्पण करपाची संद मेळ्ळी. तो फॉर्मांत दिसलो. ताणें मॅण्डिसा वांगडा मेळून दुसरे विकेटी खातीर 73 धांवड्यांची भागिदारी केली. ते पयलीं सिराजान सवे ओव्हरींत अविष्का फर्नांडोक (20) बोल्ड करून भारताक पयलें येस मेळोवन दिलें.
ते उपरांत नुवानिदु आनी मॅण्डीस हांणी स्कोर 100 मेरेन पावयलो. मॅण्डीसाक एलबीडब्ल्यू बाद करून कुलदीपान ही जोडी फोडली. एका बॉला उपरांत अक्षर पटेलान धनंजय डिसिल्वाक (0) बोल्ड केलो. नुवानिदुक शुभमन गिलान धांवबाद केलो.
कुलदीपान ते उपरांत शनाका आनी चरिथ असलंका (15) हांकां बाद करून श्रीलंकेचो स्कोर 6 विकेटींचेर 126 असो केलो. दुनिथ वेलालागे (32) आनी वानिंदु हसरंगा (21) हांणी सकयले सुवातेर उपेगी बॅटींग करून पंगडाचो स्कोर 215 मेरेन पावयलो.
मोखीचो फाटलाव करपी भारताक मुखेली रोहित शर्मा आनी शुभमन गिल हांणी जलद सुरवात करून दिली. दोगांयनी पयले विकेटी खातीर 30 बॉलांनी 33 धांवड्यो केल्यो. पूण, चार बॉलां भितर रोहित (17) आनी गिल (21) बाद जाले. फाटले मॅचींत शेंकडो मारपी विराट कोहलीक फकत चार धांवड्यो करप शक्य जाल्यो. 86 धांवड्यांचेर भारताक श्रेयस अय्यराच्या (28) रुपान चवथो धपको बसलो. चार विकेटी पडल्या उपरांत लोकेश राहुल आनी हार्दिक पांड्या हांणी डाव सांबाळ्ळो. दोगांयनी पांचवे विकेटी खातीर 75 धांवड्यांची भागिदारी केली.
36 धांवड्यांची खेळी केल्या उपरांत करुणारत्नेच्या बॉलाचेर पांड्या बाद जालो. राहुलान 93 बॉलांनी आपलो अर्द शेंकडो पुर्ण केलो. अक्षर पटेलान 21 बॉलांनी 21 धांवड्यो करून ताका बरी साथ दिली.
44वे ओव्हरींत 6 विकेटी वगडावन भारता जैत जोडलें. राहुल 103 बॉलांनी 6 चवक्यांचे मजतीन 64 धांवड्यो करून नाबाद रावलो.
श्रीलंके वतीन लाहिरु कुमारा आनी चमिका करुणारत्ने हांणी दरेकी दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
