भांगरभूंय | प्रतिनिधी
टोकियो ऑलिम्पिकांत फाटल्या चार दसकांतलो दुकळ सोंपल्या उपरांत जबरदस्त फॉर्मांत आशिल्लो भारताच्या दादल्यांचो हॉकी पंगड ह्या म्हयन्याचे अखेरेक जावपी राष्ट्रकूल खेळां सर्तींत ऑस्ट्रेलियेचो शेक सोंपोवपाक इत्सूक आसा.
राष्ट्रकूल खेळां सर्तींत हॉकीचो आस्पाव करीत पसून दादल्यांच्या गटांत ऑस्ट्रेलियेचो शेक कायम आसा. ऑस्ट्रेलियेन आतां मेरेन सवूय भांगरा पदकां जिखल्यात. ह्या खेळांत भारताचें सर्वोत्कृश्ठ प्रदर्शन नवी दिल्ली जाल्ले 2010तले आनी ग्लास्को जाल्ले 2014त केलां. दोनूय खेपे ताका रुप्या पदक फावो जाल्लें. हाचे खेरीत चार फावटी चवथी सुवात मेळयल्या.
ऑस्ट्रेलियेच्या ग्राहम रिडाच्या मार्गदर्शनाखाला भारतान फाटल्या कांय वर्सांनी बरें प्रदर्शन केलां. हाची ताजी देख म्हणल्यार टोकियो ऑलिम्पिकांतलें कांश्या पदक. फाटल्या कांय काळां पसून भारत तंदुरुस्ती कडेन झुजतालो. पूण सध्याच्या तंदुरुस्त पंगडांतलो भारत एक आसा. बरे तंदुरुस्तीचो परिणाम निकिलांनी दिसपाक लागला.
टोकियो ऑलिम्पिकांत इतिहासीक कांश्या पदक जिखल्या उपरांत भारतान अंदूंच्या एफआयएच प्रो लिगेंत बेल्जियम आनी नॅदरलॅण्ड हांच्या उपरांत तिसरी सुवात मेळयली.
भारत आपले तांकी प्रमाण खेळ करता जाल्यार तो बर्मिघमांत जावपी राष्ट्रकूल खेळां सर्तींत भांगरा पदक जिखपाक शकता.
भारता खातीर ही सर्त तितकी सोंपी लेगीत आसची ना. ऑस्ट्रेलिये खेरीत भारताक न्युझिलॅण्ड, इंग्लंड, कॅनडा आनी पाकिस्तान ह्या पंगडां कडल्यान खर आव्हान मेळपाक शकता.
भारताच्या ब गटांत इंग्लंड, कॅनडा वेल्स आनी घाना आसा. जाल्यार ए गटांत ऑस्ट्रेलिया, न्युझिलॅण्ड, दक्षीण आफ्रिका, पाकिस्तान आनी स्कॉटलॅण्ड आसा.
ह्या खेळांत कितें जातलें हाची भविश्यवाणा करप कठीण आसा. कितेंय जावपाक शकता. आंतरराष्ट्रीय हॉकींत पंगडांतलें अंतर खूब उणें आसा अशें भारताचो प्रशिक्षक रीड म्हणटा.
ज्यो गजाली आमच्या हातांत ना ते विशीं आमी कांयच करपाक शकनात. आमी आमच्या हातांत आसात त्यो गजाली सुदारपाक शकतात. पंगड सगल्या विभागांनी घटमूट आसा अशेंय ना. अजून सुदारणां करपाची गरज आसा अशें रीड हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
