भारताचो दोळो फायनलीचेर

भांगरभूंय | प्रतिनिधी

बायलांचे आशिया करंड टी-20 क्रिकेट सर्तींत आयज भारत आनी थायलॅण्ड ह्या पंगडां मदीं पयली सेमी फायनल जातली. दोनूय पंगडांचेर नदर मारली जाल्यार भारताचें दालें जड दिसता, ताका लागून सहज जैत जोडून फायनलींत सुवात मेळोवपाची भांगराळी संद भारता कडेन आसा. मुळावे फेरयेंत हे दोनूय पंगड एकामेका आड खेळ्ळ्यात. एक वटेन जाल्ली मॅच भारतान सहज जैत जोडिल्लें. भारतान थायलॅण्डाचो डाव 15.1 ओव्हरींनी फक्त 37 धांवड्यांचेर सोंपयिल्लो. उपरांत 38 धांवड्यांची मोख सहज मेळयिल्ली.

फाटली हार विसून थायलॅण्डाचे बॅट्समन आयचे मॅचींत बरें प्रदर्शन करपाक इत्सूक आसतले. थायलॅण्डान येजमान आनी सध्याचो वस्ताद बांगलादेशाक फाटीं घालून निमाण्या चारांतली सुवात निश्चीत केल्या. सर्तीक पात्र जावप फ्लूक न्हय हें थायलॅण्डाचो पंगड सिद्ध करपाक इत्सूक आसतलो. हे सर्ती वरवीं भारताक आपली बॅंच स्ट्रॅंथ तपासून पळोवपाची बरी संद फावो जाली. फुडल्या वर्सा दक्षीण आफ्रिकेंत संवसारीक टी-20 सर्त जावपाची आसा. ते पयलीं उणो अणभव आशिल्ल्या खेळगड्यांक मॅची खेळपाचो पर्याय फावो जालो.

हे रणनिती प्रमाण भारताची मुखेली हरमनप्रीत कौर स मुळाव्या पांवड्या वयल्यो फक्त तीन मॅच खेळ्ळ्या. जाल्यार पाकिस्ताना आड हारिल्ले मॅचींत ती सातवे सुवातेर बॅटिंगेक आयिल्ली. भारत फिनीशराच्या सोदांत आसा. हातूंत पंगडान आक्रमक बॅट्समन किरण प्रभू नवगिरे आनी डायलन हेमलता हांकां संद दिवन पळयली. किरणाक तीन डावांनी फक्त 10 धांवड्यो करप शक्य जाल्यो, जाल्यार तिचे परस अणभवी हेमलताक चार डावांनी फक्त 45 धांवड्यांची भर घालप शक्य जालां.

आयचे मॅचींत लेगीत पंगड वेवस्थापन प्रयोग चालू दवरतलो काय फायनलीची तयारी करपाक आपलो बळिश्ट पंगड देंवतलो हें मॅच सुरू जावपाक कांय खीण आसतना कळटलें.

दिप्ती शर्मा, स्नेह राणा आनी राजेश्वरी गायकवाड ही स्पीन तिकडी पुर्ण सर्तींत प्रतिस्पर्धी बॅट्समनांचेर अंकूश दवरपाक येसस्वी थारल्या.

भारताक आव्हान दिवपाक थायलॅण्डाचो पंगड नानापट कोंचारोएनकेई, नथाकन चेंथम आनी मुखेली चाईवाई हांचेर निंबून आसतलो. तिगांयनी सर्तींत खूब धांवड्यो केल्यात. पूण, भारताचे शिस्तीन घालपी बॉलरां मुखार तांचो मार्ग तसो सोंपो ना.

भारता खातीर सकारात्मक गजाल म्हणल्यार जेमिमा रॉड्रिग्स फॉर्मांत येवप. मदले फळयेंतली जापसालदारकी सांबाळटना जेमिमान दोन अर्द शेंकड्यांच्या नेटार 188 धांवड्यो केल्यात. पयल्या दोन मॅचींनी अपेशी थारल्ली ओपनर शेफाली वर्मान लेगीत बरे तरेन पुनरागमन केलां.