भांगरभूंय | प्रतिनिधी
भारतान बायलांचे आशिया करंड क्रिकेट सर्तीक जैतान सुरवात केली. ताणें आपले पयले मॅचींत श्रीलंका पंगडाक 41 धांवड्यांनी हारयलो. टॉस हारल्या उपरांत पयलीं बॅटींग करतना भारतान निर्धारीत 20 ओव्हरींनी 6 विकेटी वगडावन 150 धांवड्यो केल्यो.
स्मृती मंधाना आनी शेफाली वर्मा हांकां खाशेलें प्रदर्शन करपाक जमूंक ना. मंधाना 7 बॉलांनी फक्त 6 धांवड्यो करून बाद जाली. जाल्यार शेफालीन 11 बॉलांनी 10 धांवड्यो करून तंबूंची वाट धरली. दुखापती उपरांत पुनरागमन करपी जेमिमा रॉड्रिग्सान उत्कृश्ट बॅटींग करतना 53 बॉलांनी 76 धांवड्यो केल्यो. हातूंत 11 चवक्यांचो आनी एका सक्याचो आस्पाव आशिल्लो. आंतरराष्ट्रीय टी-20तलें तिचो हो आठवो अर्द शेंकडो थारलो. तशेंच आंतरराष्ट्रीय टी-20त ताचें हें सर्वोत्कृश्ठ प्रदर्शन थारलें. तिका चमीरा अट्टापट्टून बोल्ड केली.
तिचे खेरीत मुखेली हरमनप्रीत कौरान 30 बॉलांनी 33 धांवड्यो केल्यो. तिणें दोन चवके आनी एक सको मारलो. ह्या दोगांक लागून भारताक 150 मेरेन मजल मारप शक्य जालें. जेमिमा-हरमनप्रीत हे जोडयेन 71 बॉलांनी 92 धांवड्यांची भागिदारी केली.
श्रीलंके वतीन ओशाडी रणसिंगेन तीन विकेटी घेतल्यो. सुगंधिका कुमारी आनी चमारी अट्टापट्टू ह्या दोगांयनी दरेकी एक विकेट घेतली.
प्रत्युत्तर दितना श्रीलंकेचो डाव 18.2 ओव्हरींनी 109चेर सोंपलो. ताची सुरवात सामकी बाबत जाली. ताचो अर्दो पंगड 10 ओव्हरींनी 61 धांवड्यांचेर तंबूंत परतून गेल्लो.
थारावीक अंतरान विकेटी पडत गेल्यो. भारता वतीन सगल्यांत चड विकेटी दयालन हेमलता हिणें घेतल्यो. तिणें श्रीलंकेच्या तीन बॅट्समनांक तंबूंत धाडले. पुजा वस्त्रकर आनी दिप्ती शर्मा हांणीद रेकी 2 विकेटी मेळयल्यो. राधा यादवाक एक विकेट फावो जाली.
हर्षिता माधवी (26), हसिनी परेरा (30) आनी ओशाडी रनसिंगे (11) ह्या तिनूय बॅट्समनांक दोट्टी आंकडो हुपपाक शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
