भांगरभूंय | प्रतिनिधी
भारताच्या पंगडान न्युझिलॅण्डाक दुसरे मॅचींत 8 विकेटींनी हारोवन तीन वन डे मॅचींचे माळेंत 2-0 अशी निर्णायक आघाडी घेतली. हांगाच्या शहीद वीर नारायण सिंग स्टेडियमाचेर टॉस हारल्या उपरांत पयलीं बॅटींग करपी न्युझिलॅण्डाचो डाव फकत 108 धांवड्यांचेर सोंपलो. ते उपरांत मुखेली रोहित शर्माच्या अर्द शेंकड्या नेटार भारतान 2 विकेटी वगडावन 21वे ओव्हरींत जैत जोडलें.
भारतान घरच्या मैदानाचेर खेळटना सेगीत सातवी वन डे माळ जिखली. फाटल्या चार वर्सां सावन भारत घरच्या मैदानाचेर एकूय वन डे माळ हारूंक ना.
ते आदीं भारताच्या बॉलरांनी जबरदस्त प्रदर्शन करतना फकत 15 धांवड्यांचेर न्युझिलॅण्डाच्या पांच बॅट्समनांक तंबूत धाडले. मोहम्मद शमीन 18 धांवड्यो दिवन तीन आनी मोहम्मद सिराजान 10 धांवड्यो दिवन एक विकेट घेतली.
खेळपट्टी बॉलरां खातीर मजत करपी आशिल्ल्यान एकेक धांवडी घेवपाक बॅट्समनांक कठीण जाल्लें. ओपनर फिल अॅलेनाक खातें लेगीत उगडपाक जमलें ना. शमीच्या फूल लॅंथीचेर तो बोल्ड जालो. उपरांत सिराजान तिसरे सुवाते वयल्या बॅट्समनांक हॅन्री निकोल्साक बाद केलो. शुभमन गिलान ताची कॅच धरली. ते उपरांत शमी आनी हार्दिक पांड्या हांच्या उत्कृश्ट रिटर्न कॅचीं नेटार न्युझिलॅण्ड संकश्टांत सांपडलो. शार्दुल ठाकूरान एक विकेट घेतली.
न्युझिलॅण्ड संकश्टांत सांपडिल्लो. ताका शंबराचो लेगीत आंकडो हुपपाक जमचो ना अशें दिशिल्लें. पूण, फाटले मॅचींत आक्रमक बॅटींग करून भारताक घाम काडपी मायकल ब्रेसवेल (22) आनी ताचे तितकोच खतरनाक ग्लॅन फिलिप्स (36) हांणी डाव सांबाळपाचो यत्न केलो. ब्रेसवेलान 19वे ओव्हरींत शमीक सेगीत चवके मारून मॅचींत उमळशीक हाडली. पूण, शमीन तकली थंड दवरली. आनी फुडल्याच बॉलाचेर ब्रेसवेलाक बाद केलो. विकेटकीपर इशान किशानान ब्रेसवेलाची कॅच धरली.
ते उपरांत मिचेल सॅंटनर (27) हो फिलिप्साक साथ दिवपाक मैदानाचेर आयलो. दोगांयनी सातवे विकेटी खातीर 47 धांवड्यांची भागिदारी करून पंगडाक शंबरा वयर पावयलो. पूण, उपरांत दोगूय स बॉलां भितर तंबूंत परतले. ताका लागून आव्हानात्मक स्कोर उबारपाचें न्युझिलॅण्डाचें संपन भंगलें.
फिलिप्सान वॉशिंग्टन सुंदराच्या बॉलाचेर सुर्यकुमार यादवाक कॅच दिली. कुलदीप यादवान ब्लेयर टिकनराक बाद करून न्युझिलॅण्डाचो डाव 34.3 ओव्हरींनी सोंपयलो.
मोखीचो फाटलाव करपी भारताक रोहित शर्मान आनी शुभमन गिलान जलद सुरवात करून दिली. दोगांयनी पयले विकेटी खातीर 72 धांवड्यांची भागिदारी केली.
हो जोडी हॅन्री शिपलेन फोडली. ताणें रोहिताक एलबीडब्ल्यू बाद केलो. बाद जावचे पयलीं रोहितान 50 बॉलांनी 51 धांवड्यो केल्यो. हातूंत स चवक्यांचो आस्पाव आशिल्लो.
रोहित बाद जाल्या उपरांत विराट कोहली मैदानांत देंवलो. पूण, तो परतून एकदा मिचेल सॅंटनराचो शिकार थारलो. 9 बॉलांनी 11 धांवड्यो केल्या उपरांत स्टंप बाद जालो.
इशान किशनान (नाबाद 8) शुभमन गिला (नाबाद 40) वांगडा मेळून भारताक मोखी मेरेन पावयलो. माळेंतली तिसरी आनी निमाणी मॅच 24 जानेवारीक इंदौरांत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
